Harri-jasotzea

Mikel Lopetegi "Urra"k Harri Txikien Euskadiko Txapelketa irabazi du zortzigarren aldiz. 125 kiloko harri errektangularra, 125eko zilindroa, 112,5 kiloko kubikoa eta 100 kiloko bolarekin 12.450 kilo jaso ditu. Maddi Gesalagak hirugarrenez jarraian kintopekoen Euskadiko Txapelketa bereganatu du. 3.550 kilo altxatu ditu. 45 jasoaldi eman dizkio 50 kiloko zilindroari eta 26 50 kiloko kubikoari.

Zarauztarrak lehia polita izan du Ane Cestaurekin, eta Patricia Martin 2025eko txapeldunak bosgarren postua eskuratu du. Gizonezko Kintopekoen Euskadiko Txapelketan, Haritz Aranguren Norde gailendu da.

Harri-jasotzean, Olaia Esnaolak ireki du gaurko saioa, eta azpeitiarrak langa goian jarri du datozen asteetan aurkari izango direnentzat. Gari Garmendiak ere lan bikaina egin du. Aizkolaritzan, Irati Astondoa zeanuritarrak hiru puntu poltsikoratu ditu. Gizonezkoetan, Iker Vicente nagusitu da.

Bueltan da Kirol Herri. Bigarren edizioak 30 kirolari batuko ditu, harri-jasotzaileak baita aizkolariak ere. Berrikuntza batekin dator, gainera, aurtengoa: banaka arituko dira lehendabizi, eta, udaberrian, taldeka. Banakako lehia urriaren 12an hasiko da, Getarian, eta lau txapelketa jokatuko dira.

Andoni Iruretagoiena Izeta VI.ak ez du bere helburua bete Azpeitiko zezen-plazan jokatu den Euskal Pentatloi Txapelketako finalean. Aiarra bosgarren txapela jarraian janzteko atera zen, baina ez zuen bere egunik onena izan eta hirugarren postuan amaitu zuen proba.

Jokin Urretabizkaia "Basozabal" ezin pozago azaldu da 2026ko Euskal Pentatloiko txapeldun izendatu ondoren. Berak ere ezustekoa jaso duela adierazi du, eta inoiz baino gehiago gozatu duela lehiaketaz.

Jokin Urretabizkaia 'Basozabal' da Euskal Pentatloiko txapeldun berria, larunbat honetan Azpeitiko zezen plazan lehiatu den finalean marka onena egin eta Olaizola eta Izeta VI.a faboritoak garaitu ondoren. Azken hori hirugarren izan da, Beñat Telleriak lortu baitu bigarren denborarik onena lehen txandan.

Guztira bost proba egin behar izan dituzte: harri-jasotzean, 100 kiloko bolarekin 25 jasoaldi; giza-proban, 400 kiloko harriarekin bi plaza; aizkoran, hiru kanaerdiko; txingekin, 50 kilokoak, 6 plaza; eta, amaitzeko, hiru kilometro korrika (30 buelta zezen plazari).

Lehen txandan Zelai IV.a, Telleria eta Kañamares aritu dira. Telleriak abantaila hartu du harri-jasotzean eta proba osoan zehar mantendu du. Hala, 32 minutu eta 33 segundotan bukatu ditu lanak. Zelaik 2 minutu eta 7 segundora bukatu du, eta Kañamaresek 4 minutu eta 29 segundora.

Bigarren txandan Olaizola, Izeta VI.a eta Basozabal ibili dira. Oraingoan parekotasuna eta emozioa izan da. Giza-probak bukatzerako, inork ez du lortu Telleriaren marka hobetzea. Gainera, aizkoran hasterako Basozabalak ezustekoa eman du aurrea hartuz eta hiru kanaerdikoak azkarren bukatuz.

Basozabalek ziztu bizian bukatu ditu txingen sei plazak; aldi berean, Izeta hasi berria zen, eta Olaizola oraindik aizkorarekin zebilen. Olaizola faboritotzat hartzen zen, baina hondoa jo du. Izetaren kasuan ere, oso zaila zen txapela berrestea, denbora asko galdu baitu eta Telleriaren marka ere hor egon da.

Olaizolak ezin izan du gehiago eta lehiatzeari utzi dio; Basozabalek, aldiz, hiru bueltako abantailarekin, Izetaren bizkarrean jarri eta erritmoa mantendu dio, garaipena ziurtatuta zuela jakinda.

30 minutu eta 51 segundoko denborarekin, Jokin Urretabizkaia da Euskal Pentatloiko txapeldun berria.

Estefania Etxebestek historia egin du harri-jasotzaile bezala. Izan ere, pasa den larunbatean 166’4 Kiloko harria altxatu zuen. “Kontent” dagoela adierazi du Iturengoak, baina aste honetan “oso gaizki” pasatu duela ere aitortu du, oraindik ez baitu gorputza guztiz errekuperatu.

Estefania Etxebestek historia egin du. Iturengo harri-jasotzaileak Idoia Etxeberriak zuen 163,4 kiloko aurreko errekorra ontzea lortu du. 166 kiloko harriarekin, lehen ahaleginean kale egin du, baina hurrengo bi saiakerak balekoak izan dira. Harri-jasotzean emakume batek inoiz jaso duen pisurik astunena da. 

Ainitze Zumetak harri-jasotzea utziko zuela iragarri zuen bere sare sozialetan. 2024an lesionatu eta ordutik bizkarreko minez aritu da lehiatzen, gorputzak gelditzeko esan dion arte. Orain, ondo osatzea da bere helburu nagusia.

Ainitze Zumetak harrijasotzea utziko du, aldi baterako behintzat, bizkarreko arazoak medio. Zarauztarrak 2022an hasi zuen bere ibildibidea eta orduztik palmares oparoa lortu du, hala nola, 2024ko Euskal Herriko txapela eta Uliako Harriko hiru garaipen, errekorra barne.

Harri-jasotzaileen urteroko zita garrantzitsua izan dugu Donostiako Trinitate Plazan: Uliako Harria eta Igeldoko Harria txapelketak. Gizonezkoetan, Mikel Lopetegi Urra izan da garaile, iaz bezala, Igeldoko harriari 18 jasoaldi emanda. Emakumezkoetan, iazko garaileak (Ainitze Zumeta) ez du parte hartu, eta Maddi Gesalaga nagusitu da, Uliako harria 22 aldiz jasota.  

Albizuri taldeak irabazi zuen Harri Herri saioko gizonezkoen finala, Etxauriko harri-jasotzaileak mendean hartuta. Harri baldarrari 28 jasoaldi egin zizkioten Oskar Aguasek, Jon Gisasolak, Mikel Lopetegik eta Xabier Aranburu Guztak.

Albizuri taldeak irabazi du Harri Herri saioko laugarren edizioa, gizonezkoen finalean Etxauri mendean hartuta. Taldekako azken lan saioan, harri baldarrari 28 jasoaldi egin dizkiote Oskar Aguasek, Jon Gisasolak, Mikel Lopetegik eta Xabier Aranburu Guztak. 

Udane Ostolaza kapitainaren gidaritzapean, Estefania Etxebeste, Eider Garcia Durana, Sara Jimenez de Aberasturi eta Alba Zubiria harri-jasotzaileek osatutako taldeak 47 jasoaldi egin dizkio harri baldarrari azken lan saio erabakigarrian.

Joseba Ostolaza kapitainaren mutilek, Jon Marijuan, Gari Garmendia, Beñat Telleria eta Imanol Royo Lartain harri-jasotzaileek, harri baldarrari 20 altxaldi eman dizkiote 04:37 minutuan. Joxerramon Iruretagoiena Izeta II.aren lau mutilek, ostera, 15 jasoaldi egin dituzte, 04:03 minutuan.

Estefania Etxebeste, Eider Garcia Durana, Sara Jimenez de Aberasturi eta Alba Zubiria harri-jasotzaileek osatutako taldeak Mollari izango du aurkari finalean.

Estefania Etxebeste, Eider Garcia Durana, Sara Jimenez de Aberasturi eta Alba Zubiria harri-jasotzaileek osatutako taldeak 34 jasoaldi egin dizkio harri baldarrari azken lan saioan. Patricia Martin, Lierni Osa, Ane Cestau eta Naroa Arruti, ordea, denbora tarte dezente laburragoan 30 aldiz altxatzeko gai izan dira.