Realak abantailaz ekingo dio kopako derbiaren bigarren neurketari, eta Athleticek kemenez egingo dio aurre Anoetako norgehiagokari

Realak eta Athleticek elkarren indarrak neurtuko dituzte asteazken honetan Anoetan, 2025/26 Errege Kopako final handirako bigarren txartela eskuratzeko helburuarekin. Donostiako taldeak joaneko partidan San Mamesen lortutako gola du alde.

Abantaila txiki horrekin, Pellegrino Matarazzo estatubatuarraren taldeak final bat realzaleak zelaian direla gura du; izan ere, txuri-urdinek 1988tik ez dute hori lortzen. Garaikurra eskuratzeko borrokan izan zen azken aldian, hain zuzen ere 2020an, ateak itxita jokatu zuen, Athleticen aurka.

Kirol arloari dagokionez, Realak jarraian jokatuko duen hirugarren finalerdia izango da, Mallorcaren eta Real Madrilen aurka galdu baitu. Matarazzok ezin izango ditu Ruperez, Odriozola eta Kubo zelairatu, lesionaturik dabiltza eta, baina Oskarsson jokatzeko prest izango du, astearte honetan gainerako taldekideekin entrenatu ostean.

Marrero itzuliko da, badirudi azpeitiarrak defendatuko duela Realaren atea, final-zortzirenetan Osasunaren aurka bikain egin bezala, Alex Remiroren kaltetan.

"Partida irabaztera aterako gara", esan du Matarazzok astearte honetako entrenamenduaren ostean. "Bihar ez gara aterako zer gertatuko zain. Irabaztera aterako gara, lehia guzti-guztiak, pausoz pauso, partidan sartuta. Taldeak golak egitea eta oldarkor izatea nahi dut", adierazi du. Zaleak prestatzen ari diren harrerari eta Anoetan sortzea espero den giroari buruz, prestatzaile estatubatuarra "gogotsu" dago.

Derbia denboraldiko unerik onenean iritsi zaio talde zuri-gorriari, emaitzei erreparatuta behintzat. Ernesto Valverderen taldeak azken bederatzi puntuetatik zazpi lortu ditu Ligan, eta urtarrilean piztutako alarmak itzali ditu.

Azken asteetako puntuez haratago, albiste onenak erizaindegitik heldu zaizkio Athletici. Izan ere, joaneko partidan arazo fisikoek josita zegoen taldeari dagokionez, Ernesto Valverdek lau jokalari garrantzitsu izango ditu jokatzeko prest, Vivian, Yuri, Berenguer eta Sancet, baita orduan zigortuta zegoen Paredes ere. Nico Williamsek, ordea, ezin izango du jokatu.

Hasierako hamaikakoari dagokionez, ezustekorik ezean, Valverdek Alex Padillaren alde egingo du aterako, eta Rego izango litzateke Ruiz de Galarretaren ordezkoa zelai erdian, eibartarrak jokatzerik ez balu.

Valverdek astearte honetan adierazi duenez, bere taldearen eta Realaren "argudioak ezberdinak" dira, "estilo ezberdinak" dituztelako, baina biek finalera iristeko helburua dute.

Hamaikako posibleak:

Reala: Marrero; Aramburu, Caleta-Car, Jon Martin, Sergio Gomez; Gorrotxategi, Turrientes, Soler, Marin; Oyarzabal eta Guedes.

Athletic: Padilla; Gorosabel, Vivian, Laporte, Yuri; Rego, Jauregizar; Iñaki Williams, Sancet, Berenguer eta Guruzeta.

Epailea: Soto Grado errioxarra.

Futbol-zelaia: Anoeta.