Daan Hoolek irabazi du Pisako erlojupekoa, eta Issac del Torok maglia arrosari eutsi dio, Italiako Giroan

Daan Hoole Lidl-Trek taldeko txirrindulari herbehetarrak 2025eko Italiako Giroko hamargarren etapa irabazi du, Luccan hasi eta Pisan amaitu den 28,6 kilometroko erlojupekoa, asteartean, eta UAE taldeko Isaac del Toro ziklista mexikarrak sailkapen nagusiko aurreneko postuari eutsi dio. Euriak baldintzatutako etapan, Hoolek hurrenez hurren bigarren eta hirugarren postuetan sailkatu diren INEOS-Grenadierseko Joshua Tarling eta Soudal Quick-Stepeko Ethan Hayter britainiarrei gailendu zaie; sailkapen nagusian, Del Torok (UAE) 25 segundoko aldea du, orain, Juan Ayuso taldekidearekiko, eta Primoz Roglic (Red Bull-BORA) liderrarekiko 1:18ra jarri da. Xabier Mikel Azparren Q36.5 taldeko txirrindulari donostiarrak hamargarren denborarik onena lortu du, etapan.

Testuinguru horretan, kontuan izanik erlojupekoa nola jokatu duten, zaleek lehia bikoitza ikusi ahal dute lasterketan: alde batetik, etapakoa, eta jardunaldiko lehen zatian aritu diren espezialistak izan dira bertan; bestetik, sailkapen nagusikoa, borroka horretan dabiltzan gizonak onenengandik urrin ibili baitira, Pisan izandako euriagatik, baina elkarren arteko lehia polita izan baitute.

Etapa garaipenaren lehian, nabarmentzeko modukoa da Daan Hoolek egindako lan bikaina. Herbehereetako egungo erlojupeko txapeldunak seigarren postua eskuratu zuen Giroko aurreneko erlojupekoan, Tiranan, eta orain erakustaldia eman du. 26 urte dituela, Hoole talde gizona da, eta ohituta dago taldeburuentzako lana egitera; bere kirol ibilbidean, orain arteko garaipenik handiena erdietsi du.

Sailkapen nagusiari dagokionez, Primoz Roglicek izan du emaitzarik onena. Esloveniarrak 19 segundo murriztu dizkio Ayusori; azken horrek, ordea, Isaac del Toro baino 48 segundo arinago ibili da. Lasterketako sailkapena, hortaz, estutu egin da, txirrindulariek Giroaren erdia eginda dutenean.

Asteazkenean, 108. Italiako Giroko hamaikagarren etapa izango da jokoan. 186 kilometroko jardunaldia Viareggion hasi eta Castelnovo ne' Montin amaituko da, eta ibilbidean 1. mailako mendate bat eta 2. mailako bi mendate izango dira; 2. mailako azkena helmugarako bost kilometro gelditzen direla igoko dute ziklistek.

Etapako sailkapena

1 - HOOLE Daan (Lidl) 32:30

2 - TARLING Joshua (INEOS) + 0:07

3 - HAYTER Ethan (Soudal) + 0:10

4 - CATTANEO Mattia (Soudal) + 0:23

5 - AFFINI Edoardo (Visma) + 0:24

6 - VINE Jay (UAE) + 0:37

7 - PLAPP Luke (Jayco) + 0:44

8 - FRIGO Marco (Israel) + 0.47

9 - HEPBURN Michael (Jayco) + 0:50

10 - AZPARREN Xabier Mikel (Q36.5) + 0:54

Sailkapen nagusia

1 - DEL TORO Isaac (UAE) 34:11:37

2 - AYUSO Juan (UAE) + 0:25

3 - TIBERI Antonio (Bahrain) + 1:01

4 - YATES Simon (Visma) + 1:03

5 - ROGLIC Primoz (Red Bull) + 1:18

6 - MCNULTY Brandon (UAE) + 2:00

7 - YATES Adam (UAE) + 2:06

8 - CICCONE Giulio (Lidl) + 2:07

9 - CARAPAZ Richard (EF) + 2:10

10 - ARENSMAN Thymen (INEOS) + 2:27