Lointek Gernikak Valentzian irauli beharko du kanporaketa (61-71)
Lointek Gernikak hamar puntuz galdu du asteazken honetan, Malosten, Valentzia Basketen aurka (61-71), eta horrek asko zaildu dizkio Eurokopako final-zortzirenetako kanporaketa gainditzeko aukerak.
Guztiz zorigaiztokoa izan den azken laurdenean (11-25), bizkaitarrek lehen 30 minutuetan erakutsitako sendotasun guztia galdu dute, eta ez dira gai izan Joy Brown hegaleko amerikarra (17 puntu, 13 errebote eta 26ko balorazioa) eta Meiya Tirera pibot maliarra (16) gelditzeko.
Lointek Gernikarentzat dena aldrebestu da Nilokina Milic taldeko izarrari (16, 6 eta 19) laugarren falta adierazi diotenean, amaierara heltzeko 6:50 falta zirenean. Orduan, markagailuak islatzen zuen emaitza 52-49koa zen.
Mario Lopezen jokalariek azken txanpan jasan duten itzalaldira arte, pibot bosniarrak laguntza ona jaso du Belen Arrojo (10, 6 eta 14) eta Blake Dietrick estatubatuarrarengandik (13 eta 4 asistentzia).
Valentziak hobeto ekin dio norgehiagokari, 0-4 eta 4-12 aurreratu baita Abaldek eta Casasek sartutako puntuek bultzatuta, baina Gernikak erreakzionatu egin du, eta, aurretik jarri gabe izan bada ere, markagailua parekatu du lehen laurdenaren amaieran (16-17) Arrojoren grinarekin.
Bigarren laurdenean, ordea, markagailua irauli egin da, eta zazpi puntu goitik jarri dira gernikarrak (28-21), atsedenaldira arte akatsik egin gabe jardun duen Milicen iaiotasunari esker (5/5, biko jaurtiketetan; 12 puntu). Dena den, neurketa erabakitzeke zegoen bigarren zatian (32-29).
Hirugarren laurdena ildo beretik joan da, etxekoena izanik jokoaren ekimena (48-41 amaierara iristeko 12:11ren faltan). Haatik, guztia aldatu da azken hamar minutuetan.
Etxekoen jokoaren geldialdia iritsi denean, bisitariek 13 puntuko aldea bereganatu dute (58-71); alabaina, Itziar Ariztimuñok azken hatsean sartutako hirukoak gernikarren itxaropenak elikatu ditu, datorren astean Fontetan jokatuko den itzuliko partidari begira.
Fitxa teknikoa:
61 - Lointek Gernika Bizkaia (16+16+18+11): Gaby Ocete (8), Blake Dietrick (13), Margaret Roundtree (6), Belén Arrojo (10) eta Nikolina Milic (16) -hasierako bostekoa-; Gintare Mazionyte (2), Naiara Diez, Itziar Ariztimuño (3) eta Juana Molina-Prados (3).
71 - Valentzia Basket (17+12+17+25): Anna Gomez (6), Queralt Casas (15), Joy Brown (17), Tamara Abalde (4) eta Meiya Tirera (16) -hasierako bostekoa-; Julia Reisingerova (7), Roso Buch (4), Jana Raman (2) eta Irene Gart.
Epaileak: Paulo Marques (Portugal), Alfred Jovovic (Kroazia) eta Sonia Teixeira (Portugal). Meiya Mirera kanporatu dute faltengatik (39. min).
Zure interesekoa izan daiteke
Inversus, Gernika KESBren babesle nagusia denboraldi baterako
Inversus Gernika Bizkaia izango da aurrerantzean talde bizkaitarraren izen ofiziala, Gerardo Candina presidenteak eta Jose Joaquin Vicente Inversus Groupen zuzendari nagusiak sinatutako akordioan jaso denez.
Irune Orio hegalekoa Gernika KESBera itzuli da NCAAn egin duen etaparen ostean
22 urteko eta 1,88 metroko altuera duen jokalaria etxera itzuliko da lau denboraldiz munduko liga gogorrenetako batean aritu ondoren.
Samantha Galanopoulos joko-antolatzaile greziarra Gernika KESB taldera batu da
Grezian Esperides Kallitheas eta Panathinaikos taldeetan lehiatu ondoren, Galanopoulos Malostera iritsiko da Emakumezkoen Endesa Ligan etapa berri bati aurre egiteko.
Gernika KESBk Elena Bosgana hegaleko greziarra fitxatu du, 2026-2027 denboraldirako
Bosgana, 22 urtekoa eta 1,90ekoa bera, Leganesetik iritsi da euskal taldera. Greziako selekzioarekin internazionala izan da, eta Gernika KESBk espero du “fisikoa, moldakortasuna eta hainbat posiziotatik eragiteko gaitasuna” emateari taldeari.
Naia Zubiagak ez du Gernika KESBen jarraituko datorren denboraldian
Harrobiko jokalariak 2024-2025 denboraldian egin zuen debuta lehen taldearekin, eta bigarren denboraldian ere etxean jokatu ostean, harremana etengo du klubarekin.
Gernika KESB taldeak Seehia Ridard hegal-pibot frantziarra fitxatu du
Poloniako AZS UMCS Lublin taldetik iritsiko da. Gernikak azpimarratu duenez, "uztaitik gertu jokatzeko, kantxan korrika egiteko eta barruko posizioetatik espazioak irekitzeko gaitasuna" du jokalari frantziarrak.
Esther Matarranzek Gernika KESB taldearekin berritu du
Barruko jokalari madrildarrak beste urtebetez defendatuko du elastiko granatea.
Aaronette Vonleh pibotak kontratua berritu du Gernika KESB taldearekin
Urtarrilean iritsi zen klubera, eta jokatu dituen 14 partidetan batez beste 7,6 puntu eta 3,6 errebote lortu ditu 18 minututan.
Estel Puiggros joko-antolatzaile kataluniarra, Gernika KESBren lehen fitxaketa
Puiggros Unicaja Mijas taldetik iritsiko da. Talde bizkaitarrak baieztatu duen hirugarren jokalaria da, Ane Olaeta joko-antolatzailearen eta Angela Salvadores eskoltaren ondoren.
