Realak nagusitasunez kanporatu du Celta (1-2), eta Kopako finalerdietarako sailkatu da
Reala 2023-24 denboraldiko Errege Kopako finalerdietara sailkatu da, asteartean, Celta Abanca Balaidos futbol zelaian 0-2 irabazita, final laurdenetako kanporaketan. Mikel Oyarzabal kapitainak, bigarren minutuan, eta Sheraldo Becker debutariak, 66.ean, Imanolen taldeari sailkatzea eman dioten golak egin dituzte. Realak partida bikaina jokatu du Balaidosen, eta Celta baino askoz gehiago izan da; Galiziako taldeak 92. minutuan sartu du 1-2koa, eta ez du inolako aukerarik izan Realaren garaipena zalantzan jartzeko.
Imanolek Sheraldo Becker jarri du hasierako hamaikakoan, jokalari herbeheretarraren lehenengo partidan; Jon Aramburuk, Beckerren atzean, eskuin hegalean jarraitu du, eta Martin Zubimendi zelai erdira bueltatu da. Testuinguru horretan, Realak denbora oso laburra behar izan du aurreneko kolpea emateko; 2. minutuan, alboko sake baten ondorioz, Mikel Merinok jaso du baloia area barruan, nafarrak erdiratu eta Mikel Oyarzabalek, gertutik, ondo desmarkatuta, sareetara errematatu du buruz.
Golak lasaitasun handia eman dio Realari; Celtak, aldiz, ez du erantzunik eman, ondorengo minutuetan. Imanolen taldeak, atsedenaldira arte, ez du arazorik izan norgehiagoka kontrolatzeko. Zelai erdian, Merino, Brais Mendez eta Zubimendi oso nagusi izan dira, eta, atzealdean, Robin Le Normand eta Igor Zubeldia maila oso onean ibili dira, azkar eta adi. Becker debutaria ondo sartu da eskuineko hegaletik jokaldi batzuetan, halaber.
Merinok izan du 0-2koa, 23. minutuan, ezkerkada on batean, baina Ivan Villar Celtako atezainak erantzun ona eman du. 39. minutuan, Andre Silvak, berriro ere estrategiako jokaldi batean, atetik hurbil, langa gainetik jaurti du. Reala jaun eta jabe zen, eta albiste txar bakarra, lehen zatian, Kieran Tierneyren lesioa izan da; eskoziarrak, 39. minutuan, berdegunea utzi behar izan du, minduta. Oyarzabalek area ertzetik eta buelta erdian egindako ezkerkada polit batek eman dio amaiera lehenengo zatiari; kapitainaren jaurtiketa zutoinetik hurbil atera da kanpora.
Atsedenaldiaren ostean, Arsen Zakharyan zelairatu da, Andre Silvaren ordez, eta Jon Aramburu ezker hegalera pasa da, Tierneyren lekuan, Aritz Elustondo eskuinaldean gelditu dela. Celtak aurrerapausoa eman du. Rafa Benitezen taldea Reala estutzen ahalegindu da, baina, egia esan, ia-ia ez da iritsi Alex Remiroren areara, eta txuri-urdinek ez dute arazo handirik izan partidaren kontrolaz berriro argi jabetzeko.
66. minutuan, kontraeraso ezin hobe batean, Realak bigarren gola sartu du. Mikel Oyarzabalek Braisi eman dio, azken horrek Sheraldo Beckerri, eta Realeko jokalari berriak ezin hobeto jaurti du, urrutitik, Ivan Villar gainditzeko. Eskuin hegalekoa ez zegoen jokoz kanpo, pasea jaso duenean bere zelaian baitzegoen, eta, gerora, bikain ibili da, gola erdiesteko.
Realak, puntu horretan, partida nahi zuen tokian zeukan. Celta oso menderatuta zuen, jokoan erabat nagusi zen, eta, hogei bat minutu gelditzen zirela, sailkatzea oso bideratuta zuen. Etxeko taldean, Iago Aspas eta Jorgen Strand Larsen zelairatu dira, Beckerrek gola sartu baino pixka bat lehenago, baina Remiro oso lasai zebilen, lan oso txikia zuen eta.
Willioti, Celtaren aldetik, eta Oyarzabali eta Zakharyani, Realean, ez zaie asko falta izan beste gol bat egiteko. Luzapenean, 92. minutuan, ezkerretik egindako jokaldi baten ondorioz, Luca de la Torre estatubatuarrak baloia jaso eta, ezkerrez, barrura bidali du. Denbora oso laburra zuen Celtak berdinketaren bila aritzeko, eta Realak ondo baino hobeto jokatu ditu azken minutu horiek; atzealdean sendo, Donostiako taldeak ez dio inolako aukerarik eman aurkariari bigarren gola eskuratzeko.
Finalaurrekoan da Reala, 2020an bezala. Orduan, kanporaketa horretan, Mirandes utzi zuen txapelketatik at, finalerako txartela lortzeko. Oraingoz, zain izango dira ondorengo egunetan Imanolen gizonak ea zein izango den 2024ko aurkaria finalerdian.
Fitxa teknikoa
1 - Celta: Ivan Villar; Kevin Vazquez (Mingueza, 64. min), Starfelt, Carlos Dominguez, Ristic; Miguel Rodriguez (Luca de la Torre, 46.min), Tapia (Fran Beltran, 71. min), Jailson (Iago Aspas, 64. min), Hugo Alvarez; Swedberg (Larsen, 78. min) eta Douvikas.
2 - Reala: Remiro; Aramburu, Zubeldia, Le Normand, Tierney (Aritz, 38. min); Becker (Pacheco, 78. min), Zubimendi, Merino, Brais Mendez (Sadiq, 78. min); Oyarzabal (Magunazelaia, 89. min) eta Andre Silva (Zakharyan, 46. min).
Golak: 0-1, 2. min: Oyarzabal. 0-2, 66. min: Becker. 1-2, 92. min: Luca de la Torre.
Epailea: Soto Grande (Gaztela eta Leon). Celtako Douvikas (45. min), Larsen (91. min) et Ristic (93. min), eta Realeko Merino (64. min) eta Magunazelaia (94. min) zigortu ditu, txartel horia ateraz.
Gertakizunak: Errege Kopako final laurdenetako kanporaketako partida, Abanca Balaidos futbol zelaian. 20.903 zale izan dira bertan.
Zure interesekoa izan daiteke
Realak Aston Villari irabazi dio, Ingalaterran, eta denboraldiaurrean galdu gabe jarraitzen du (2-4)
Talde txuri-urdinaren golak Carlos Soler, Orri Oskarsson, Gorka Carrera eta Iñaki Ruperezek sartu dituzte. George Hemmings eta Brian Madjo izan dira ingelesen golegileak. Norgehiagoka Walsalleko (Ingalaterra) Pallet-Track Bescot zelaian jokatu da, 9.000 bat zaleren aurren. Bi taldeak atsedenaldira banakoarekin joan dira, eta gainerako golak bigarren zatian heldu dira.
Carlos Fernandezek Oviedon jokatuko duela iragarri du Realak
Donostiara heldu eta hilabete gutxira belauneko lesio larri batek markatutako bost denboraldi eta erdi igaro ostean, aurrelari andaluziarra Asturiasko taldera joango da Realarekin 59 partida jokatu eta 5 gol sartu eta gero.
Realak Jon Martinen kontratua 2032ra arte luzatu duela iragarri du
20 urterekin, Lasarteko erdiko atzelaria ezinbestekoa da Matarazzorentzat Realaren atzealdean.
Harrera beroa egin diote Mikel Oyarzabali Zubietan
Estatu Batuetatik iritsi berritan, Zubietan izan da Mikel Oyarzabal. Entrenatzen zebiltzan taldekideek txalo artean hartu dute eibartarra Munduko Txapelketa irabazi duelako.
Gorka Carrerak 2031 arte luzatu du kontratua Realarekin
Errenteriako aurrelaria bigarren talde txuri-urdinaren golegile nagusia izan zen aurreko denboraldian. Gainera, lehenengo taldearekin lau partida jokatzea lortu zuen.
Gorrotxa: “Lehenengo jardunaldian taldearekin batera lehiatzea da asmoa”
Gorrotxak pubalgia du aurreko denboralditik. Hobetze aldera, “plan bat” egiten ari direla azaldu du eibartarrak eta “lehenengo jardunaldian taldearekin lehiatzea” da ideia. Datorren denboraldia polita bezain gogorra izango da Realarentzat, baina Europa tartean, gogotsu agertu da jokalaria.
Realak berdindu egin du denboraldiaurreko lehen partidan Racingen aurka (1-1)
Realak bana egin du Zubietan Racingen aurka jokatu duen denboraldiaurreko lehen partidan. Rino Matarazzok bi hamaikako probatu ahal izan ditu, bana zati bakoitzean. Oskarssonek gola sartu du donostiarrentzat 19. minutuan, eta Gabriel Gimenezek kantabriarrentzat 82.ean.
Luken Beitiak 2030ra arte berritu du bere kontratua Realarekin
Elgoibargo atzelaria funtsezko zutabea izan da Sanserentzat azken denboraldi hauetan eta denboraldiaurrea lehen taldearekin egiten ari da, Rino Matarazzoren aginduetara.
Barrene: “Helburua lehiaketa guztietan ahalik eta gorenen egotea da”
Ander Barrenetxeak eta Realak hainbat egun daramatzate denboraldi berria prestatzen. Donostiako erasotzaileak argi du taldearen helburua "lehiaketa guztietan ahalik eta gorenen egotea" izan behar dela. Zentzu horretan, Superkopa titulu berri bat lortzeko aukera egingarria dela adierazi du, eta aldi berean, taldea denboraldi honetan sistema berri batekin lehiatzea ez litzatekeela batere arraroa izango adierazi du. (Bideoa gazteleraz).
Reala denboraldi berria hasi da prestatzen Zubietan
Reala denboraldi berria hasi da prestatzen Zubietan. Azken egunetan osasun azterketak egin ondoren, Arturo Ruizek 26 jokalari izan ditu bere esanetara gaurko lehen entrenamenduan. Taldeak 6 fitxaketa iragarri ditu. Aurten Europan jokatzeko erronka izango dute aurrean.