Realak Osasuna kanporatu du, eta final-laurdenetara sailkatu da (0-2)
Realak aurrera egin du Osasunaren aurkako Errege Kopako kanporaketan, txuri-urdinak (0-2) gailendu baitira txapelketako final-zortzirenei zegokien lehian. Donostiarren gol biak bigarren zatian iritsi dira: lehendabizikoa, Mikel Oyarzabalek lortu du penaltiz (56. minutua); bigarrena, neurketa amaitzear zela etorri da (97. minutua), eta Mikel Merinok egin du, Aitor Fernandezek Brais Mendezi gelditu dion beste penalti baten aldaratzean.
Etxekoek bizi ekin diote lehiari, eta hirugarren minutua bete orduko jokaldi eztabaidagarri bat egon da Realaren arean. Gorritxoek penalti eskatu dute Zubeldiak Budimir trabatu duelakoan, baina epaileak ez du halakorik ikusi, eta VARetik ere ez diote kontrako abisurik eman. Erabaki horrek Sadarren bildutako zale gorritxoen haserrealdia eragin du.
Horren ostean, jokoaren ekimenak Jagoba Arrasateren jokalariena izaten jarraitu du hurrengo minutuetan ere, nahiz eta Remiroren ate inguruan arrisku garbirik sortu ezin; Reala, bere aldetik, bi-hiru pase elkarlotu ezinda zebilen.
Apurka-apurka txuri-urdinak neurketara egokitu eta baloiaz jabetu dira, eta Barrenetxearen eskutik ezinegona sortu dute Osasunaren atzeko lerroan pare bat aldiz. Dena den, norgehiagokak erritmo gutxi izan du lehen zatian, geldialdi ugari egon baitira batak zein besteak egindako falta ugariengatik.
Atsedenaldira heldu aurretik, gorritxoena izan da hurbilketarik nabarmenena berriro ere. Orduko horretan, Budimirrek larregi gurutzatu du bere jaurtiketa, Realaren atetik urruti.
Partidari indartsu berrekin dio Realak, eta zenbait abagune kateatu ditu: lehendabizikoan, Zakharyanek ez du ondo baliatu Merinok bidalitako pasea. Gerora, 52. minutuan, Silvak Catenaren gorputzaren aurka bidali du area barrutik egindako errematea. Jokaldiak aurrera jarraitu du, eta aldaratzea Zakharyani heldu zaio area ertzean. Errusiarraren jaurtiketari erantzun bikaina eman dio Aitor Fernandez atezainak, eta baloia kornerrera aldendu du.
Minutu bat geroago, epaileak penaltia adierazi du Osasunaren aurka, Catenak Le Normandi heldu diola ikusita. Hernandez Hernandezek ez du zalantzarik izan futboleko zigor gorena adierazteko; alabaina, VARa ikustera joan behar izan du atzelari gorritxoari erakutsi beharreko txartela zein koloretakoa izan behar zen argitzeko. Hala, hasiera batean, txartel horia erakutsi badio ere, VARa ikuskatu ostean, gorri kolorekoa bihurtu da. Ondorioz, Osasuna 10 jokalarirekin geratu 56. minutuan.
Oyarzabalek, beste behin ere, 11 metroetatik aparteko abilezia duela azaldu du, eta gola lortu du bere taldearen alde.
Jokalari bat gutxiagorekin egon arren, Osasunak bultzatu egin du berdinketa lortzeko asmoz, eta Realak, ostera, kontraerasoak bilatu ditu kanporaketa behin betiko erabakitzeko. Horietako batean, partida ia amaituta zegoela, Brais bakar-bakarrik geratu da Aitorren aurrean, eta atezain eibartarrak penaltia egin dio. Brais bera saiatu da penaltia gauzatzen, baina Osasunaren atezainak gelditu egin du galiziarraren saiakera. Hori bai, aldaratzea Mikel Merinori heldu zaio, eta hark ez du barkatu bigarren gola erdiesteko.
Horrenbestez, Imanol Alguacilen taldea Athleticen batera egongo da ostiralean, urtarrilaren 19an, 13:00etatik aurrera egingo den final-laurdenetako kanporaketan.
Fitxa teknikoa:
0 – Osasuna: Aitor Fernández; Areso, Catena, David García, Juan Cruz, Mojica (Peña, 65. min); Moncayola, Torró (Rubén García, 65. min), Aimar (Pablo Ibáñez, 84. min); Arnaiz (Kike Barja, 79. min), Budimir (Raúl García, 79. min).
2 – Real Sociedad: Remiro; Aritz (Aramburu, 80. min), Le Normand, Zubeldia, Tierney; Zakharyan, de Zárate (Turrientes, 60. min), Merino, Barrene (Brais Méndez, 60. min); André Silva (Magunazelaia, 74. min), Oyarzabal (Sadiq, 74. min).
Golak: 0-1, 57. min: Oyarzabal. 0-2, 96. min: Merino.
Epailea: Alejandro José Hernández Hernández. Txartel horiak: Areso (Osasuna); Magunazelaia eta Le Normand (Reala). Txartel gorri zuzena atera dio Osasunako Catenari, penaltia egiteagatik.
Zure interesekoa izan daiteke
Valverde: "Bihar aurrerapauso bat emateko aukera paregabea dugu"
Athleticeko entrenatzailea EA Sports Ligako 28. jardunaldian Gironaren aurka jokatuko duten partidaz aritu da. Horren arabera, Gironari etxean irabaztea zaila izango da, baina proba hori gainditzea dute helburu.
Zuzenean: Jokin Aperribayren prentsaurrekoa Kopako finaleko sarreren inguruan aritzeko
Realeko presidentea Anoetako prentsa aretoan agertuko da 16:00etatik aurrera, Kopako finaleko sarrerei buruzko azalpenak emateko.
Elene Errasti Alaveseko jokalaria: "Espero dugu iazko bukaera hobetzea eta helburua betetzea"
Sei jardunaldiren faltan, Alaves da emakumezkoen bigarren mailako liderra. Horrela amaituz gero, elitera igotzea lortuko dute. Zazpi puntuko abantaila dute bigarren sailkatuarekiko, baina nahiago dute zuhur jokatu, iaz igoera gertu izan zutelako eta ihes egin zielako.
Quique Sanchez Flores: “Alavesek etxean lortu ditu puntu gehienak, jarraitzaileen animoekin. Horri eutsi behar diogu”
Alavesek bi puntura du jeitsiera, hortaz, oso garrantzitsua da arabarrentzat bihar garaipena lortzea. Gainera Quique Sanchez Flores estreinakoz arituko da etxean, zaleen aurrean.
Real Madrilek, Bodo/Glimtek eta PSGk final-zortzirenetako kanporaketak bideratu dituzte
Madrilgo eta Norvegiako taldeek Manchester City eta Sporting Portugal 3-0 jipoitu dituzte, hurrenez hurren, eta egungo txapeldunak 5-2 irabazi dio Chelseari, Parisen. Bayer Leverkusenek eta Arsenalek, aldiz, bana berdindu dute.
Iranek baztertu egin du Munduko Txapelketan parte hartzea, AEB eta Israelen eraso militarra dela eta
Iranek Belgika, Egipto eta Zeelanda Berriaren aurka jokatu behar zituen multzoen faseko hiru partidak Ameriketako Estatu Batuetan, horietako bi Los Angelesen eta beste bat Seattlen. Azaroan, Trumpek bermatu zuen jokalari eta teknikari irandarrek bisak izango zituztela AEBn sartzeko, baina ez haien zaleek.
Errege Kopako finalaren sarrerak izendunak izanen direla zehaztu du Realak
Horrela, sarreran agertzen diren datuek (izen-abizenak eta NANa) apirilaren 18an Cartuja estadiora sartzen den pertsonarenak izan beharko dute.
Matarazzo, Kopako finalaz: “Aukera paregabea da"
Realaren entrenatzaileak, asteazkenean, talde txuri-urdinaren informazioaz arduratzen diren kazetariekin gosaldu du; topaketan, Errege Kopako finala izan dute hizpide, batez ere.
Maroan Sannadi: "Oso pozik nago, bueltan egoteak sentsazio ona ematen dit"
Maroan Sannadi Athleticeko jokalaria bueltan da, belauneko lesioa osaturik du eta. Nola sentitzen den azaldu du prentsaurrekoan.
Bayernek eta Atleticok kanporaketa bideratu dute, eta Galatasarayk aurrea hartu du
Turkiako taldeak ezustean harrapatu du Liverpool (1-0) kanporaketaren hasieran, Alemaniako taldeak Atalanta jipoitu dute Bergamon (1-6), koltxoneroek 5-2 irabazi diote Tottenhami eta Bartzelonak azken hatsean berdinketa (1-1) lortu du Newcastlen.