Dena emanda ere, Osasunak ezin du Atleticorekin (1-0)
Osasunak 1-0 galdu du Atleticoren aurka Metropolitanon. Gorritxoek irudi ona eman dute, baina erasoan ez dute asmatu, eta, azkenean, punturik gabe bueltatu dira Madrildik. Vicente Morenoren taldeak zazpigarren jardunaldia kateatu du Ligan garaipenik lortu gabe.
Osasuna bosteko defentsarekin eta Raul Garcia de Haro puntan jarrita zelairatu da Metropolitanon; Budimir aulkian geratu da. Vicente Morenok ezustekoa eman du hamaikakoarekin, eta plana aldatu du, defentsako lerroa sendotuz eta hegaletatik min egiteko asmoa erakutsiz.
Hala ere, hasierako minutuetan Atletico izan da nagusi, eta etxeko taldea laster aurreratu da markagailuan. Alabaina, Diaz de Merak baliorik gabe utzi du gola, jokaldia VAReko monitorean berrikusi eta gero. Griezmannek besoarekin jota sartu du baloia sarean, eta epaileak ez du zalantzarik izan.
Julian Alvarezek ere zenbait aukera izan ditu, baina Sergio Herrerak maila ona eman du eta geldiketa erabakigarriak egin ditu.
Atleticoren lehen oldarraldia etenda, gorritxoek aurrerapausoa eman dute eta aurkariaren zelaian jokatzen hasi dira, arrisku gehiegirik sortu gabe izan bada ere. Aukerarik onena Herrandok izan du, Oblaken hutsa baliatuta, baina burukada kanpora joan zaio.
Atsedenaldia heldu baino lehen, Pablo Ibañezek Oblak aurreratuta zegoela ikusi du, eta baloia zelai erditik jaurti du, bitan pentsatu gabe. Kanpora joan da.
Horrela amaitu da lehen zatia. Gol aukera onenak Simeoneren mutilek izan dituzte, baina Osasunak irudi oso ona eman du, eta dena bigarren zatian erabakitzeko utzi dute bi taldeek.
Aldagelatik bueltan, Atleticok izan du baloiaren jabetza, eta laster hartu du aurrea markagailuan, Julian Alvarezek estrategiako jokaldi on batean gola eginda. Griezmannek erdiratu du, Lengletek buruz luzatu du jokaldia, eta aurrelari argentinarrak baloia sarera bidali du. Sergio Herrerak ezin izan du ezer egin gola ekiditeko.
Edonola ere, Osasuna ez da kikildu. Gorritxoek hasierako planari eutsi diote, eta aurpegia ematen jarraitu dute. Gola jaso ostean, Vicente Morenok lehen aldaketak egin ditu: Moncayola, Aimar Oroz eta Areso sartu dira, Boyorno, Torro eta Ruben Peñaren ordez, hurrenez hurren.
Osasunak oldarkorrago jokatu du. Raul Garciak jaurtiketa bortitza egin du, baina baloia kanpora joan zaio. Handik gutxira, partidako jokaldi polemikoena heldu da: Pablo Barriosek Ruben Garciari penaltia egin diola eskatu dute gorritxoek, baina epaileak ez du halakorik ikusi.
Ondoren, Atletico partida lokartzen saiatu da, eta luzapenean bigarrena egiteko aukera izan du. Bretonesek eta Catenak gutxigatik ez dute baloia euren atean sartu, baloiak zutoina jo baitu. Jokaldi horrekin amaitu da norgehiagoka.
Osasunak zazpi jardunaldi pilatu ditu Ligan irabazi gabe; Atleticok, berriz, goi-goian bukatu du lehen itzulia, Real Madrilen eta Bartzelonaren aurretik.
FITXA TEKNIKOA
1- Atletico Madril: Oblak; Molina, Lenglet, Le Normand, Galan; De Paul, Barrios, Giuliano (Llorente, 73. min), Gallagher (Lino, 46. min); Julian Alvarez (Correa, 76. min) eta Griezmann.
0- Osasuna: Herrera; Bretones, Catena, Herrando, Boyomo (Aimar Oroz, 63. min); Torre (Areso, 64. min), Ibañez, Ruben Peña (Moncayola, 63. min), Ruben Garcia (Arnaiz, 85. min), Moi Gomez; eta Raul Garcia (Budimir, 78. min).
Gola: 1-0, 55. min: Julian Alvarez.
Epailea: Diaz de Mera Escuderos. Txartel horia atera die Atleticoko Giulianori eta Samu Linori, eta Vicente Moreno Osasunako entrenatzaileari.
Zure interesekoa izan daiteke
Osasunak 2028ra arte lotu du Mauro Echegoyen, kontratua beste bi denboraldi luzatzeko aukerarekin
Jokalariaren etete-klausula sei milioira igo dute, eta 15 milioira iritsiko da lehen taldeko kide denean. Dagoeneko Murchanteko erdilariak urrian egin zuen debuta lehen taldearekin, Sant Jordiren aurka Kopako lehen kanporaketan.
Juan Cruz: “Ohorea eta harro egoteko modukoa izan da Osasunaren armarria defendatzea”
Atzelari madrildarrak Nafarroako kluba utzi du, azken sei denboraldiak Iruñean eman ostean. Agur esatean, nabarmendu du 2023ko Errege Kopako finala dela haren oroitzapenik bereziena, eta, halaber, taldekideekin eta Taxoaren egunero-egunero bizi izandakoa.
Braulio Vazquez: “Uste dut pizgarri bat behar genuela, katarsi bat"
"Ez dut barkamenik eskatuko 8 urtez lehen mailan mantentzeagatik, nortzuk garen jakin behar dugu. Ez dakit zenbat aldiz entzun dudan anbizio falta dagoela", aurpegiratu du kirol zuzendari gorritxoak denboraldi amaierako prentsaurrekoan. Bestalde, Kike Barja kapitainaren kontratu berritzea % 99ra itxitzat jo du.
Juan Cruzek ez du Osasunan jarraituko
Atzelariak sei denboraldi eman ditu Nafarroako klubean; Elxetik iritsi zen bertara. 164 partida jokatu ditu talde gorritxoan: “Bere lehen denboralditik, taldekideen eta zaleen errespetua eta maitasuna bereganatu zituen, eta balioak defendatzen jakin izan du”, nabarmendu du Iruñeko klubak.
Alessio Liscik Osasunako entrenatzailea izateari utzi dio
Nafarroako klubak astelehenean iragarri du italiarrak ez duela jarraituko taldea zuzentzen; Liscik beste urtebeterako kontratua zuen, Osasunarekin.
Catena: “Ez da izan espero genuen bezala, ezta nahi genuen bezala ere, baina Lehen Mailan gaude"
Osasunako jokalariak salbazioa lortu ondoren hitz egin du, nahiz eta Getaferen aurka galdu (1-0) EA Sports Ligako azken jardunaldian. Kritiko agertu da denboraldi amaieragatik, batez ere atzetik datozenei eragindako "sufrimenduagatik".
Osasunak galdu egin du Getaferen aurka, baina Lehen Mailan jarraituko du (1-0)
Porrotaren ondoren, aurkari zuzenen emaitzen zain geratu dira. Gironaren eta Elxeren arteko berdinketak mesede egin dio talde nafarrari, horri esker beste urtebetez Lehen Mailan jarraituko baitu.
Lisci: “Taldea zelaian hilko da”
Alessio Lisci Osasunako entrenatzaileak autokritika egin du eta adierazi du gaizki egin zutela pentsatuz 42 puntu bilduta nahikoa zela mailari eusteko. Edonola ere, taldea ondo dagoela eta Getaferen aurkako “finalean” gorritxoek dena emango dutela ziurtatu du.
Zer behar du Osasunak mailari eusteko?
Osasunak ez dauka ziurtatuta lehen mailan jarraitzea, eta Getaferen etxean jokatuko du ligako azken partida. Jose Bordalasen taldeak, berriz, Conference Ligan sartzea izango du lehian.
Ateak irekita entrenatuko du Osasunak ostiralean, Sadarren, 18:00etan, Getaferen aurkako partida erabakigarriaren aurretik
Osasunaren zaleek talde nafarrari bultzada emateko aukera izango dute, Coliseum estadioan jokatuko den partidaren bezperan; talde gorritxoak EA Sports Ligan eustea bilatuko du.