Alavesek dena emanagatik, Real Madrilek erdietsi du garaipena (0-1)

Alavesek 0-1 galdu du Real Madrilen aurka Mendizorrotzan, eta, horrenbestez, ezin izan dio jarraipena eman Gironan lortu zuen garaipenari, jaitsierako postuetatik gehiago urruntzeko.

Chacho Coudeten taldea oso ondo aritu da lehen zatian, baina markagailuan Real Madrilek hartu du aurrea, Camavingak sartutako golari esker.

Atsedenaldia baino lehen, Soto Grado epaileak Kylian Mbappe kanporatu du, falta beldurgarria egin baitu, eta Carlo Ancelottiren taldea gizon bat gutxiagorekin aritu da hainbat minutuz.

Babazorroak saiatu dira, baina Madrilek atzera jo du, eta ondo babestu da bigarren zatian. Gainera, 70. minutuan, epaileak txartel gorria atera dio Manu Sanchezi, eta partida gehiago zaildu da etxeko taldearentzat.

Alaves indarrean hasi da, eta Carlo Ancelottiren taldeari asko kostatu zaio bere jokoa egitea. Babazorroek presio handia egin dute, baloia galtzen zuten bakoitzean, eta Real Madrili kontraerasoan ateratzea oztopatzen jakin dute. Gainera, Courtoisen ate ingurura ere arriskuarekin heltzeko ahalmena izan dute.

Hala ere, lehendabiziko abisua Madrilgo taldeak eman du 18. minutuan. Korner batean, Asenciok gola sartu du, baina Soto Grado epaileak baliorik gabe utzi du, jokaldia VAR-eko monitorean ikusi ostean, Rudigerrek Owono atezainari falta egin diola adierazita.

Sustoa gaindituta, Alavesek berean jarraitu du, eta Kike Garciak gola egiteko aukera izan du, area barrutik jaurtiketa eginda. Baloia gora joan zaio.

Handik gutxira iritsi da Real Madrilen 0 eta 1ekoa. Camavingak egin du area kanpotik baloia gogor astinduta.

Neurketa aldapa gora jarri zaio Chacho Coudeten taldeari, baina ez du atzera egin. Alderantziz, tinko jarraitu du, eta Carlos Vicentek abagune bikaina izan du berdinketa lortzeko.

38. minutuan gertatu da partidako jokaldi erabakigarria: Mbappek sarrera izugarria egin dio Antonio Blancori, zelai erdian, eta epaileak txartel gorria atera dio, falta VAR-eko monitorean berrikusi eta gero.

Real Madril jokalari bat gutxiagorekin geratu da, eta horrek emaitza iraultzeko itxaropena piztu du Gasteizko taldean.

Bigarren zatian, baina, Alavesi gehiago kostatu zaio arriskua sortzea, Ancelottiren taldeak pauso bat atzera eman baitu, jokalariak defentsa lanetan pilatuta.

Kike Garcia edota Toni Martinez saiatu dira, baina ez dute asmatu, eta minutuak igaro ahala, Real Madril lehen zatian baino erasoago egon da zelaian, bat gutxiagorekin aritu arren.

Gainera, indarrak berriro parekatu dira 70. minutuan, epaileak Manu Sanchez kanporatu duenean. Erdilariak Viniciusi falta gogorra egin dio, eta Soto Gradok txartel gorria atera dio, jokaldia VAR-eko monitorean berrikusi ostean.

Jokaldi hori ere erabakigarria izan da, eta partida aldatzea eragin du, Alavesen kaltetan, zelaian zuen abantaila bakarra galtzea ekarri baitio.

Indarrak berriro parekatuta, Real Madrilek bigarrena egiteko aukera izan du, Bellinghamen eskutik, eta babazorroak azken segundoraino saiatu dira. Baina ezinezkoa izan zaie. Gutxirekin irabazi du du Ancelottiren taldeak. 

FITXA TEKNIKOA

0- Deportivo Alaves: Owono; Tenaglia, Mouriño, Abqar (Diarra, 76. min), Manu Sanchez; Antonio Blanco (Protesoni, 83. min), Joan Jordan (Guevara, 76. min); Carlos Vicente, Aleña (Cabanes, 83. min), Carlos Martin (Toni Martinez, 60. min); eta Kike Garcia.

1- Real Madril: Courtois; Lucas Vazquez, Asencio, Rüdiger, Fran Garcia (Brahim, 77. min); Valverde (Ceballos, 92. min), Tchouameni, Camavinga; Arda Güler (Bellingham, 62. min), Mbappe eta Rodrygo (Vinicius, 62. min).

Gola: 0-1, min.34: Camavinga.

Epailea: Soto Grado. Txartel hori atera die Alaveseko Jordani, Carlos Martini eta Tenagliari, eta Real Madrileko Camavingari, Lucas Vazquezi, Viniciusi eta Courtoisi. Txartel gorria atera die Kylian Mbapperi eta Manu Sanchezi.