Tadej Pogacarrek beste erakustaldi bat eman du Italiako Giroko etapa nagusia irabazteko

UAE Emirates taldeko Tadej Pogacar txirrindulari esloveniarrak irabazi du, igandean, 2024ko Italiako Giroko hamabosgarren etapa, Livignon, Mottolino 1. mailako mendatean, aurtengo Giroko etapa nagusia, eta, horrenbestez, are gehiago sendotu du sailkapen nagusian duen aurreneko postua. Pogacarrek lau etapa garaipen daramatza 2024ko Giroan, eta beste erakustaldi bat eman du: helmugarako 14 kilometrora jo du erasoa faboritoen multzoan, sailkapen nagusiaren lehian dauden gainerako txirrindulariak atzean utzi, eta aurretik ziren gizonak aurreratu ditu, pixkanaka. Esloveniarrak sei minutu eta 41 segundora du Geraint Thomas, sailkapen nagusiko bigarrena, lasterketa amaitzeko oraindik astebete falta denean.

107. Giroko etapa nagusiak aurreikuspenak bete ditu, eta biziki gogorra izan da. Une ikusgarriak ere izan ditu. Tarte erabakigarrian sartu denean, txirrindulariek Mortirolo atzean utzita eta aurretik Passo di Foscagno eta Mottolino zituztela, 17 gizonek osatutako multzo bat zen lasterketa buruan. Sailkapen nagusiko onena Tudor taldeko Michael Storer zen, baina Pogacarrekiko bederatzi minutu baino gehiagora zegoen; UAEko esloveniarra tropelean zihoan, taldekideek ondo babestuta.

Eguneko laugarren eta azken-aurreko mendaterako bidean, iheslariek hiru minutu eta erditik gorako aldea aterata zioten faboritoen multzoari. Aurrean, besteak beste, hauek zihoazen: Julian Alaphilippe, Nairo Quintana, Juanpe Lopez, Pelayo Sanchez eta Simon Geschke. Astana taldeko Christian Scaroni ere zebilen aurrenekoen artean; berak izan du ohorea aurtengo Giroan Mortiroloko pankartapetik lehenengo postuan igarotzeko.

Foscagnon, ihesaldia hainbat taldetan sakabanatu da. Azken 20 kilometroetan sartuta, EF Education taldeko Georg Steinhauser zen lasterketa buruan, Vismako Attila Valter segundo batzuetara zihoan, eta hainbat gizon, tartean Storer, minutu batera zeuden. Hamalau bat kilometro falta zituztenean, Movistar taldeko Nairo Quintanak Steinhauserrekin bat egin duen unean, Tadej Pogacarrek jo du atzetik. Bere erara egin du esloveniarrak; gogor egin du aurrera, eta, bereziki, jarraipena eman dio. Berehala ireki du zuloa, sailkapen nagusiko gainerako aurkariak apurka-apurka gero eta urrunago utzita, eta ihesaldian zeudenen bila joan da.

Pogacarrek ez die inolako aukerarik eman aurkariei. Oraindik aurretik zihoazen ziklista guztiak aurreratu ditu, banan-banan, eta, aurretik soilik Mottolino falta zutenean, Nairo Quintana besterik ez zuen harrapatu gabe. Ziklista kolonbiarrak etapa bikaina egin du, Steinhauser gazteak bezala, baina maglia arrosaren jabeak argi eskuratu du gaurkoan ere garaipena. Tadej Pogacarrek poltsikoan du Giroa, egunak daramatza helburu hori lotzeko lanean, eta azken astea du oraindik orain arte lortu duen abantaila are gehiago handitzeko.

Italiako Giroak atseden eguna izango du astelehenean, ekitaldi honetako bigarrena eta azkena, eta hamaseigarren etapa jokatuko dute asteartean, Livigno eta Santa Cristina Val Gardena artean 206 kilometroko ibilbidea izango duena. Txirrindulariek Coppi gaina igoko dute, Giogo di Santa Maria, 1. mailako Passo Pinei, eta 2. mailako Santa Cristina Val Gardena; izan ere, azken mendate horretan amaituko da Dolomitetako etapa handia.

Etapako sailkapena

1 - POGACAR Tadej (UAE) 6:11:43

2 - QUINTANA Nairo (Movistar) + 0:29

3 - STEINHAUSER Georg (EF Education) + 2:32

4 - BARDET Romain (DSM) + 2:47

5 - MARTINEZ Daniel Felipe (BORA) + 2:50

6 - THOMAS Geraint (INEOS) m. t.

7 - RUBIO Einer (Movistar) + 2:58

8 - O'CONNOR Ben (Decathlon) m. t.

9 - ARENSMAN Thymen (INEOS) + 3:05

10 - HIRT Jan (Soudal) + 3:20

Sailkapen nagusia

1 - POGACAR Tadej (UAE) 56:11:46

2 - THOMAS Geraint (INEOS) + 6:41

3 - MARTÍNEZ Daniel Felipe (BORA) + 6:56

4 - O'CONNOR Ben (AG2R) + 7:43

5 - TIBERI Antonio (Bahrain) + 9:26

6 - ARENSMAN Thymen (INEOS) + 9:45

7 - BARDET Romain (DSM) + 10:49

8 - ZANA Filippo (Jayco) + 11:11

9 - RUBIO Einer (Movistar) + 12:13

10 - HIRT Jan (Soudal) + 13:11