Iva Slonjsak jokalariak Kutxabank Araski utzi du

Iva Slonjsakek ez du Kutxabank Araskin jarraituko datorren denboraldian. Kroaziako jokalaria urtarrilean iritsi zen Gasteizko taldera Laura Aliagaren baja betetzeko.

Fitxatu zutenetik, Arabako taldearen erasoko jokalari garrantzitsuenetako bat izan da; horrez gain, haren ekarpena erabakigarria izan da Araskik mailari eustea lortzeko.

Slonjsek 14 partida jokatu ditu taldearekin, neurketako batez beste 25 minutu jokatuta. Hegalekoak, batez beste 10,4 puntu eta 3,3 errebote lortu ditu norgehiagokako. Gainera, hiruko jaurtitzaile trebea izan da, jaurtitako hirukoen % 41 saskiratuta.

Klubak eskerrak eman dizkio Iva Slonjsaki Araskin eman dituen hilabeteetan egin duen lanagatik, eta onena opatu dio etorkizunerako.