Realak, partida bikaina eginda, berdindu egin du Inter Milanekin (1-1), Txapeldunen Ligako lehen neurketan
Realak 1-1 berdindu du, Inter Milanekin, asteazken gauean, Donostian, Reale Arenan, 2023-24 denboraldiko Txapeldunen Ligako D multzoko lehen jardunaldian. Brais Mendezek aurretik jarri du Reala, laugarren minutuan, eta Lautaro Martinezek sartu du 1-1ekoa, 87. minutuan.
Horrela amaitu da partida, emaitzari dagokionez; gauak, baina, kontuan izateko moduko hainbat gauza gehiago utzi ditu. Giroa ikaragarri polita izan da Anoetan, eta talde txuri-urdinak Inter Milan baino askoz hobeto jokatu du; izan ere, Imanolen gizonek garaipena merezi izan dute, Europako egungo txapeldunordearen aurka. Simone Inzaghiren jokalariek, Italian, A Seriean, ezin hobeto ekin diote txapelketari, eta aurkari guztiak ari dira menderatzen; Anoetan, baina, ikusi ahal izan dute Donostiako taldearen maila bikaina dela. Erakutsi egin du Realak taldea zaleek amets egiteko moduan dabilela.
Realeko jokalari guztiek egin dute partida ederra, baina, beste behin, nabarmentzeko modukoa da zelai erdiko futbolariek burututako lana. Braisek, Mikel Merinok eta Martin Zubimendik baloi mordoa lapurtu dituzte, eta, horrez gain, fin aritu dira aurrelariekin bat egiteko. Ezkerrean, Kieran Tierney eta Ander Barrenetxea oso ondo ibili dira, bai eta Take Kubo beste aldean ere.
Salzburgok 0-2 irabazi du Lisboan, Benficaren aurka, eta multzoko lehen postuan jarri da. Realak, bigarren jardunaldian, Austrian jokatuko du, liderraren aurka; bertan saiatuko dira txuri-urdinak asteazkenean ihes egin dion garaipena lortzen. Ia dena falta da oraindik, eta edozer gerta daiteke Txapeldunen Ligan.
Realaren nortasuna
Imanolek, neurketaren bezperan, "nortasuna" eskatu zion Realeko jokalariei; bada, taldeak ezin hobeto barneratuta zuen entrenatzaileak esandakoa, eta txuri-urdinek bikain heldu diote partidari. Bigarren minutuan, Braisek, Barrenetxeak ezkerretik jokaldi polita eginda, buruz errematatu du, eta Sommerrek aurreneko geldiketa egin behar izan du; jarraian, area barrutik, Barrenetxeak zutoinera jaurti du. Inter Milanek ez zuen ikusten nola egin aurrera. Laugarren minutuan, Alessandro Bastonik, baloia ateratzen saiatzen ari zela, huts egin du; Braisek ederto lapurtu du, area handiko ertzera iritsi da, eta ezkerrez, sareetara bidai du baloia. 1-0 laugarren minutuan, eta Anoetak eztanda egin du.
Laugarren minutu horretatik atsedenaldira bitartean, Realak irakatsi egin du nola jokatu behar den maila goreneko partida bat. Inter zelai erdia bereganatzen ahalegindu da, baina Donostiako taldeak ez du estutasunik izan; minutuek aurrera egin ahala, Imanolen gizonak, pixkanaka-pixkanaka, aurkariaren atera gero eta sarriago hurbildu dira. Aurreneko zatiko azken minutuetan, Realak partida oso bideratuta uzteko moduko abaguneak izan ditu: 40. minutuan, Kubok jokaldi oso polita egin du eskuinetik, erdiratu, eta Le Normandek, buruz, gertutik, kanpora errematatu du, oso gutxigatik; lau minuturen buruan, Kubok, ezkerrez, jaurtiketa zail batean, berriro ere behartu du Sommer. Atezainak, ziur aski, eskertu egin du lehen zatiaren amaiera; 1-0ekoa, emaitza, onena zen Interrentzat, kontuan izanik Reala Europako txapeldunordea baino askoz hobeto ari zela jokatzen.
Norbaitek pentsatuko zuen, agian, Inter Milan, atsedenaldiaren ostean, hobeto ibil zitekeela, eta nolabait partida aldatuko zela; bada, uste okerra zen. Realak jokoa kontrolatzen jarraitu du, eta gertu-gertu izan dute Imanolen gizonek 2-0ekoa, bigarren zati horretako aurreneko minutuetan. Braisek izan du aukera ederra, falta batean, eta, ia jarraian, Mikel Oyarzabalek, korner baten ondorioz, burukada ona egin du; Sommerrek geldiketa ikusgarria egin behar izan du, Gipuzkoako taldearen bigarrena saihesteko.
Lautarok berdindu du
Ematen zuen emaitza, 1-0ekoa, Interrentzako albisterik onena zela; Inzaghiren taldeak partidan jarraitzen zuen, ia-ia espero gabe, Merinok, 68. minutuan, langara errematatu baitu. Azken ordu laurdenean, baina, Inter biziago presionatzen hasi da, eta Realari indar apur bat falta izan zaio. Lautarok egin du berdinketa, 87. minutuan; jokaldi luze batean, Frattesik, azkenean, urrutitik jaurti du, eta, nahi barik, pase sakon bikaina eman dio taldekideari.
Horrenbestez, azken inpresioa da Realak aukera bikaina izan duela aurkari oso gogor bat menderatzeko; baina argi izan beharko genuke txuri-urdinek, beste behin, maila ederra eman dutela. Txapeldunen Ligako estreinaldia gogoan izateko modukoa izan da.
Fitxa teknikoa
1 - Reala: Merino; Traore (Odriozola, 70. min), Zubeldia, Le Normand, Tierney (Aihen, 60. min); Zubimendi, Merino, Brais (Pacheco, 86. min); Barrenetxea (Cho, 60. min), Oyarzabal (Sadiq, 70. min) eta Kubo.
1 - Inter Milan: Sommer; Bastoni (Di Marco, 55. min), De Vrij (Acerbi, 76. min), Pavard; Dumtries, Barella, Asllani (Frattesi, 55. min), Mkhitaryan (Alexis Sanchez, 69. min), Carlos Augusto; Lautaro eta Arnautovic (Thuram, 55. min).
Golak: 1-0, 4. min: Brais Mendez. 1-1, 87. min: Lautaro.
Epailea: Michael Oliver (Ingalaterra). Zubeldia, Traore, Asllani, Mkhitaryan eta Pavard jokalariei atera die txartel horia.
Gertakizunak: 38.000 zalek bete dute Reale Arena, Txapeldunen Ligako multzo faseko lehen jardunaldian. Inter Milango ehunka zale izan dira, harmailetan.
Salzburgok 0-2 irabazi du Lisboan, Benficaren aurka, eta multzoko liderra da
D multzoko beste partidan, Salzburgok ezustekoa eman eta Benfican menderatu du, Lisboan, Da Luz futbol zelaian, 0-2. Simicek, 15. minutuan, eta Gloukhek, bigarren zatiko seigarrenean, Austriako taldearen bi golak egin dituzte. Salzburgo da, horrenbestez, Realaren multzoko liderra, eta hain zuzen ere Imanolen taldea hartuko du liderrak, bigarren jardunaldian.
Gainerako partidak: Artetaren Arsenalek PSV jipoitu du, Bayern Munich-Manchester United neurketa bikaina izan da, eta Mendilibarren Sevillak berdindu egin du
Jardunaldian jokatu dituzten gainerako partidetan, nabarmentzeko modukoa da Mikel Artetaren Arsenalek PSVri sartutako 4-0ekoa, bai eta Munichen izandako neurketa bikaina ere; horretan, Bayern Munichek 4-3 menderatu du Manchester United. Gainera, Jose Luis Mendilibarren Sevillak etxean berdindu egin du, 1-1, Lensen aurka.
Hauek izan dira gainerako markagailuak:
Galatasaray 2 – 2 Kopenhage
Real Madril 1 – 0 Union Berlin
Bayern Munich 4 – 3 Manchester United
Braga 1 – 2 Napoli
Arsenal 4 – 0 PSV
Sevilla 1 – 1 Lens
Zure interesekoa izan daiteke
Realak Aston Villari irabazi dio, Ingalaterran, eta denboraldiaurrean galdu gabe jarraitzen du (2-4)
Talde txuri-urdinaren golak Carlos Soler, Orri Oskarsson, Gorka Carrera eta Iñaki Ruperezek sartu dituzte. George Hemmings eta Brian Madjo izan dira ingelesen golegileak. Norgehiagoka Walsalleko (Ingalaterra) Pallet-Track Bescot zelaian jokatu da, 9.000 bat zaleren aurren. Bi taldeak atsedenaldira banakoarekin joan dira, eta gainerako golak bigarren zatian heldu dira.
Carlos Fernandezek Oviedon jokatuko duela iragarri du Realak
Donostiara heldu eta hilabete gutxira belauneko lesio larri batek markatutako bost denboraldi eta erdi igaro ostean, aurrelari andaluziarra Asturiasko taldera joango da Realarekin 59 partida jokatu eta 5 gol sartu eta gero.
Realak Jon Martinen kontratua 2032ra arte luzatu duela iragarri du
20 urterekin, Lasarteko erdiko atzelaria ezinbestekoa da Matarazzorentzat Realaren atzealdean.
Harrera beroa egin diote Mikel Oyarzabali Zubietan
Estatu Batuetatik iritsi berritan, Zubietan izan da Mikel Oyarzabal. Entrenatzen zebiltzan taldekideek txalo artean hartu dute eibartarra Munduko Txapelketa irabazi duelako.
Gorka Carrerak 2031 arte luzatu du kontratua Realarekin
Errenteriako aurrelaria bigarren talde txuri-urdinaren golegile nagusia izan zen aurreko denboraldian. Gainera, lehenengo taldearekin lau partida jokatzea lortu zuen.
Gorrotxa: “Lehenengo jardunaldian taldearekin batera lehiatzea da asmoa”
Gorrotxak pubalgia du aurreko denboralditik. Hobetze aldera, “plan bat” egiten ari direla azaldu du eibartarrak eta “lehenengo jardunaldian taldearekin lehiatzea” da ideia. Datorren denboraldia polita bezain gogorra izango da Realarentzat, baina Europa tartean, gogotsu agertu da jokalaria.
Realak berdindu egin du denboraldiaurreko lehen partidan Racingen aurka (1-1)
Realak bana egin du Zubietan Racingen aurka jokatu duen denboraldiaurreko lehen partidan. Rino Matarazzok bi hamaikako probatu ahal izan ditu, bana zati bakoitzean. Oskarssonek gola sartu du donostiarrentzat 19. minutuan, eta Gabriel Gimenezek kantabriarrentzat 82.ean.
Luken Beitiak 2030ra arte berritu du bere kontratua Realarekin
Elgoibargo atzelaria funtsezko zutabea izan da Sanserentzat azken denboraldi hauetan eta denboraldiaurrea lehen taldearekin egiten ari da, Rino Matarazzoren aginduetara.
Barrene: “Helburua lehiaketa guztietan ahalik eta gorenen egotea da”
Ander Barrenetxeak eta Realak hainbat egun daramatzate denboraldi berria prestatzen. Donostiako erasotzaileak argi du taldearen helburua "lehiaketa guztietan ahalik eta gorenen egotea" izan behar dela. Zentzu horretan, Superkopa titulu berri bat lortzeko aukera egingarria dela adierazi du, eta aldi berean, taldea denboraldi honetan sistema berri batekin lehiatzea ez litzatekeela batere arraroa izango adierazi du. (Bideoa gazteleraz).
Reala denboraldi berria hasi da prestatzen Zubietan
Reala denboraldi berria hasi da prestatzen Zubietan. Azken egunetan osasun azterketak egin ondoren, Arturo Ruizek 26 jokalari izan ditu bere esanetara gaurko lehen entrenamenduan. Taldeak 6 fitxaketa iragarri ditu. Aurten Europan jokatzeko erronka izango dute aurrean.