Zarragak ez du Athleticekin zuen kontratua berrituko

Athleticek astearte honetan iragarri duenez, Oier Zarragak ez du talde zuri-gorrian jarraituko ekainaren 30etik aurrera, "Klubak eta futbolariak euren arteko kontratua berritzeko akordiorik lortu ez dutelako".

Zarraga (24 urte) Lezaman trebatu zen alebin mailatik, eta urrats guztiak igaro ditu Lehen Mailara iritsi arte. 2020ko urriaren 18an debutatu zuen lehen taldearekin, Gaizka Garitanoren aginduetara, Levanteren aurkako liga partida batean.

Ordutik, jokalari bizkaitarrak 72 partida ofizial jokatu ditu zuri-gorri gisa (Ligako 62, Kopako 8 eta Superkopako 2), eta bi gol sartu ditu.

Getxoko erdilariaren baja Iñigo Martinez erdiko atzelariarena eta Ander Iru hirugarren atezainarena ezagutu diren egun berean eman da jakitera.

Beraz, ekainaren 30ean kontratua bukatzen duten futbolarien artetik, Raul Garciaren egoera baino ez dago konpontzeke.