Lointek Gernika, Eurokoparen erronkari ekiteko prest

Lointek Gernika Bizkaiak gaur jokatuko du Emakumeen Eurokopako multzoen faseko lehen jardunaldiko partida Spar Citylift Girona taldearen aurka. Lehen aldiz jokatuko du emakumeen talde bizkaitar batek Europako txapelketa baten. Neurketa asteazken honetan jokatuko da, 20:00etan, Bilboko Casillan. Partida zuzenean eskainiko dute ETB4k eta eitb.eus webguneak.

Baja garrantzitsuak ditu Gernikak barrualdeko jokoan. Amaya Gastaminza min hartuta dago, Talia Caldwell nahiko berandu iritsi zen, eta Mario Lopez entrenatzaileak ezingo du Marina Kuzina azken fitxaketarekin kontatu.

Bizkaiko taldeaz eta Spar Citylift Gironaz gain, Basket Landes eta CEKK Cegled taldeak daude Eurokopako G multzoan.