Bihar hasiko da ardi-moztaile eta artilarien Munduko Txapelketa Zeelanda Berrian

Euskal Herriko selekzioa bihar hasiko da Golden Shears and Woolhandling World Championship txapelketan Mastertonen (Zeelanda Berria). Larunbatera arte luzatuko da lehia. Une historikoa da, izan ere, lehen aldiz lehiatuko da euskal taldea munduko txapelketa ospetsuenean. Estreinaldia, gainera, ardi-mozketaren sorleku modernotzat jotzen den herrialdean izango da.

Azken asteetan, taldeak prestakuntza lan handia egin du Zeelanda Berriko lurretan, hango baldintzetara egokitzeko. Selekzioko kideak egunero entrenatu dira, ingurune, lehiaketa-erritmo eta ardi mota desberdinetara ohitzeko. Entrenamendu horiek tokiko lehiaketekin konbinatu dituzte, eta, horri esker, nazioarteko espezialista onenetako batzuekin lehiatzeko aukera ere izan dute.

“Lan asko egin dugu azken asteetan. Asko ikasi dugu eta egokitzapena ongi joan da. Eguneroko entrenamenduek, lehiaketek eta erreferente diren mundu mailako moztaile zein artilariekin prestakuntzan aritzeak nazioarteko maila gorenaren erritmoa eta exijentzia bertatik bertara ezagutzeko aukera eman digute”, azaldu dute Zeelanda Berritik. Taldeak artilea makinaz nahiz artaziz mozteko eta artilea sailkatzeko teknikak ere hobetu ditu, hainbat alderdi zainduz. Hala nola artilearen garbitasuna, animaliaren kokapena eta mugimenduen zehaztasuna eta abiadura.

Prestaketaren azken fase honetan, funtsezkoa izan da erreferentziazko profesionalekin hartu-emana izatea, besteak beste, 2019ko munduko txapeldunarekin, Alan Oldfieldekin. Hainbat lan-jardunalditan izan dira berarekin. Prentsa oharrean azaldu dutenez, esperientzia baliagarria izan da xehetasun teknikoak doitzeko eta taldearen konfiantza sendotzeko, nazioarteko hitzordu handiari ekin aurretik.

Emaitzetatik haratago, “Euskal Herria Munduko Txapelketan egotea garaipena da jada. Urrats garrantzitsua euskal lehen sektorearen aitortzarako eta, era berean, ardi-moztaileon eta artilarion ofizioa jendaurrera eramateko ere. Belaunaldiz belaunaldi transmititutako ezagutza hau bizirik mantentzeko modu bat da”, azpimarratu dute.

Bidea eta prestakuntza osatuta, selekzioak erabakimenez eta konfiantzaz egingo dio aurre txapelketari, eta ziur daude debutak “etapa berri baten hasiera” markatuko duela nazioarte mailan.

Euskal Herriko selekzioa

Makina bidezko ile-moztaileak: Mikel Etxebarria (Dima, Bizkaia), Joseba Ugalde (Lezama, Bizkaia)

Artazi bidezko ile-moztaileak: Ipar Arrinda (Lekeitio, Bizkaia), Josu Ekisoain (Ibiriku, Nafarroa)

Ilaginak: Janire Artabe (Dima, Bizkaia), Mikel Velasco (Arrasate, Gipuzkoa)

Taldeburua: Joseba Attard (Bedaroa, Bizkaia)