Donostia eta Gipuzkoa osoa, Cartujako festaren parte izateko prest

Realak larunbatean jokatuko duen Kopako final handira begira, dena prest da Donostian eta Gipuzkoa osoan. Hala jakinarazi dute gaur arratsaldean klubaren, Aldundiaren eta Udalaren ordezkariek, Gipuzkoa Plazan egindako agerraldian.

Larunbatean Donostian izango den jai eremu nagusiko egitarauaren berri eman dute. Realzaleek egitarau zabalaz gozatzeko aukera izango duten, izan ere, lurralde osoan hainbat gune eta pantaila ezarriko dituzte.

Non jarriko dute zaleentzako gunea?

Sevillako finala Donostian bizi ahal izango dute zaleek, Sevillan izango den irrikak eta giro ederrak isla izango baitu Alderdi Ederren. Udaletxearen inguruan eta Realak, Foru Aldundiak, Donostiako Udalak, EITBk eta Kutxabankek batera antolatuta, jai eremu bat kokatuko dute, egun berezia han bizi nahi duten zale guztiak bilduko dituena. Leku aproposa, ehunka realzalez inguratuta, historikoa izatea espero den jardunaldia bizitzeko.

Zein ordutan irekiko eta itxiko da zaleen gunea?

15:00etatik 01:00etara, Donostiako Udaletxearen inguruak Cartujako gunearekin bat egingo du.

Eta, norgehiagoka ikusteko?

Bi pantaila erraldoi jarriko dira, Sevillako festa esparruarekin konektatzeko, eta ekitaldi eta ezustekoz beteriko agenda izango da gozagai.

Zein artista arituko dira?

Eñaut Elorrieta, Go!azen, Xabi Solano, Gozategi eta DJ Jonkassen emanaldiek alaituko dute jardunaldia eta Iban Garcia, Gabriela Uriarte, Miren Nogales eta Alex Padilla arituko dira aurkezle, egunak martxa eta giro ganorazkoa izan ditzan. Zaletu txikienek ere berentzako lekua izango dute, Portuko gunean, 11:00etatik 19:00etara, puzgarriak eta jolasak izango baitira bertan, baita MAKUSI Gunea ere.

Donostian kokatuko den zaletuentzako gune nagusiaz gain, erakundeen elkarlanari esker lurraldeko hainbat eta hainbat herritan ezarriko dira pantaila erraldoiak eta horrelako guneak.

Ekintza horien guztien berri eman dute elkarrekin Gipuzkoako ahaldun nagusiak, Eider Mendozak; Donostiako alkateak, Jon Insaustik; Realaren presidenteak, Jokin Aperribayk; Kutxabanken presidenteak, Anton Arriolak; eta EITBren Kirol zuzendariak, Joseba Urkiolak.

Eider Mendozak gogorarazi du gipuzkoarrok partekatzen ditugun “balio nagusiak” ordezkatzen dituela Realak, hala nola, “apaltasuna, talde lana, harrobia, koloreei errespetua, elkartasuna, komunitatea”.

Jon Insausti Donostiako alkateak azaldu bezala, “kolore txuri-urdinak eragiten digun sentimenduari forma eman nahi izan diogu kalean eta horretarako antolatu dugu realzale guztion topagunea, Alderdi Eder bezalako leku esanguratsuan”.

“Donostian, Gipuzkoan eta Sevillan jendeak final handi honetaz gozatzea nahi dugu. Aldi berean, zaleak animatu nahi nituzke Sevilla hiria, bertako erakundeak eta aurkaria errespetatzen jakin dezaten. Sentimendu, ilusio eta indar guztiarekin goaz Sevillara, partida handi bat egin eta garaipen historiko bat lortzeko helburuarekin”, berretsi du Jokin Aperribayk, Realeko presidenteak.

Joseba Urkiolak adierazi duenez, finala zuzenean jarraitu ahal izango da ETB1en, ETB ON plataforman, kirolakeitb.eus atarian eta  baita Euskadi Irratian eta Radio Euskadin ere. 30 profesional baino gehiagoko lantaldea izango da Sevillan zuzeneko saioak, erreportajeak eta elkarrizketak egiten.