Ruben Peñak kontratua luzatu du Eibarrekin 2021. urtera arte

Ruben Peñak Eibar taldeko jokalaria izaten jarraituko du 2021. urteko ekainaren 30era arte, talde armaginarekin zuen kontratua beste bi denboraldiz luzatu ostean. Jokalariaren eta klubaren arteko hitzarmena 2019an amaitzen zen, eta akordio berri honi esker, beste bi denboraldi egingo ditu Peñak Eibarren.

Denboraldi hasieran minutu asko izan ez dituen arren, Avilako 26 urteko jokalaria bigarren itzuli bikaina egiten ari da, hamaikakoan tokia egina du, eta dagoeneko 26 neurketa jokatu ditu; 24 Ligan eta 2 Kopan, guztira 1.547 minutu jokatu dituelarik. Peñaren lan onak Mendilibarren konfiantza irabazteko balio izan du, eta defentsako lerroan, erdialdean, zein erasoan jokatzeko balio izan dio.