Athleticek Fenerbahçe menderatu du Istanbulen, 0-2, Williamsek bi gol sartuta, eta oso indartsu jarraitzen du
Athleticek Fenerbahçe mendean hartu du, 0-2, 2024-25 denboraldiko Europa Ligako liga faseko seigarren jardunaldian, Istanbuleko Sükrü Saraçoglu futbol zelaian, asteazken arratsaldean. Iñaki Williamsek sartu ditu euskal taldearen bi golak, bosgarren eta 45. minutuetan. Horrenbestez, Ernesto Valverderen taldeak 16 puntu ditu batuta, txapelketako sei partida jokatuta, eta, behin-behinean, sailkapeneko aurreneko postuan dabil. Zuri-gorriek oso indartsu jarraitzen dute sailkapen horretako lehenengo zortzi postuetako bat eskuratzeko lehian; izan ere, liga fasea lehen zortzien artean amaitzea saria dauka, final zortzinetarako zuzenean sailkatzea, alegia.
Ernesto Valverdek Agirrezabala aukeratu du hamaikakorako, Gorosabel irten da titular atzealdeko eskuinaldean, eta zelai erdian, Ruiz de Galarretarekin batera, Jauregizar atera da hasieratik. Fenerbahçek presio handia egin du lehenengo minutuetan, baina Athleticen erantzuna oso sendoa izan da, Bizkaiko taldeak 0-1ekoa egin baitu bosgarren minutuan. Gola Iñaki Williamsek lortu du, baina jokaldiaren meritua Gorka Guruzetari eman behar zaio; aurrelari donostiarra kontrol oso polita egiten saiatu da, pase luze batean, eta, jarraian, ezin hobeto baliatu du Akaydin atzelariak egindako pase txarra. Guruzeta, Livakovic atezainaren aurrean, eskuinera ireki du baloia, eta Williamsek sareetara bidali du.
CONTENIDO NO ENCONTRADO
Euskal taldea sendo zebilen eta nortasuna ari zen erakusten, Sükrü Saraçoglu futbol zelaian. 28. minutuan, Gorka Guruzeta, berriro ere, Fenerbahçeko atezainaren aurrean gelditu da, baina Livakovicek aldendu egin du jokalari zuri-gorriaren jaurtiketa. 37. minutuan, Nico Williamsek, belaunean mina hartuta, berdegunea utzi behar izan du, eta Alex Berenguer zelairatu da haren ordez. Müldürri, lehen zatiko azken txanpan, gutxigatik joan zaio kanpora jaurtiketa on bat, Turkiako taldeak ordura arte egindako erasoko jokaldirik onenean.
45. minutuan, Iñaki Williamsek area barruan jaso du baloia, eskuinaldean, Sancetek pasea eginda, eta, lehen zutoinera oso ondo jaurtiz, Athleticen bigarren gola sartu du. Gol ikusgarria izan da, indarrez beterikoa, eta egoera oso onean uzten zuen talde zuri-gorria, bigarren zatiari begira.
Vivian irten da, lesionatu den Yerayren ordez, atsedenaldiaren ostean. Athleticek ondo jarraitu du, indartsu zelai erdian, azkar ahal izan duenean. Berenguerrek eta Sancetek, 52. eta 63. minutuetan, gertu izan dute hirugarren gola; Fenerbahçek ez zuen amore ematen, baina hamar jokalarirekin gelditu da, 68. minutuan, Müldürri bigarren txartel horia atera baitiote.
Neurketako azken minutuetan, Athleticek ez du estutasun handirik izan garaipena bermatu eta Europa Ligan hiru puntu gehiago poltsikoratzeko. Nabarmentzeko moduko garaipena izan da, zuri-gorrientzat, Jose Mourinhoren Fenerbahçeren kontra lortutakoa. Beste behin, Athleticek berretsi du sasoi puntu oso onean dabilela.
Norgehiagoka bukatuta, Athleticek iragarri du Yerayk eta Nico Williamsek "kolpe bana" izan dutela. Hain zuzen ere, Yeray ez da zelaira irten atsedenaldiaren ostean "eskuin hankako bikian kolpea jaso" baitu, eta Nico Williamsek, ordea, "eskuin hankako belaunean kolpe handia" izan du. Bi jokalariak bilakaeraren zain daude.
Fitxa teknikoa
0 - Fenerbahçe: Livakovic; Osayi-Samuel, Djiku, Samet Akaydin (Caglar Soyuncu, 46. min), Mert Müldür; Ismail Yüksek, Amrabat, Tadic (Ünder, 73. min); Szymanski (Dzeko, 61. min), Saint-Maximin (Kahveci, 73. min) eta En-Nesyri.
2 - Athletic: Agirrezabala; Gorosabel, Yeray (Vivian, 46. min), Paredes, Yuri; Ruiz de Galarreta, Jauregizar (Prados, 67. min); Iñaki Williams, (Vesga, 84. min), Sancet, Nico Williams (Berenguer, 37. min); eta Guruzeta (Unai Gomez, 67. min).
Golak: 0-1, 5. min: Iñaki Williams. 0-2, 45. min: Iñaki Williams.
Epailea: Irfan Peljto (Bosnia-Herzegovina). Fenerbahçeko Müldür kanporatu du, bi txartel hori aterata, eta Amrabat (Fenerbahçe) eta Athleticeko Yeray, Unai Gomez eta Sancet zigortu ditu, txartel horia erakutsita.
Nabarmentzekoa: 50.000 bat zale izan dira Sükrü Saraçoglun; horietako 850 athleticzaleak izan dira.
Zure interesekoa izan daiteke
Iñaki Williams baja izango da Bergamon, giharretako lesioa du eta
Athleticen kapitainak giharretako lesioa du ezker hankako trieps sonalean, talde zuri-gorriak argitaratutako osasun-partearen arabera.
Athleticek porrot latza jaso du Tenerifen (5-0)
Athleticek 5-0 galdu du Teneriferen aurka F Moeve Ligako 16. jardunaldian. Lehen zatian gol bakarra egin diete, baina bigarrenean gol zaparrada jaso dute.
Valverde: "Oso emaitza etsigarria da, eta are gehiago nola heldu den ikusita"
Ernesto Valverde haserre agertu da Son Moixen, Athleticek 3-2 galdu ostean, epailearen erabakiek baldintzatutako partida batean. Epaileak Mallorcaren aldeko bi penalti polemiko adierazi ditu VARean berrikusi eta gero, Guruzeta egotzi du, eta Lekueri (aulkian zegoen) ere txartel gorria atera dio.
Simon: "4. epaileak txartel bat ateratzeko esan dio epaileari aulkia lasaitzeko, eta gorria atera du!"
Mallorcaren aurkako partida erabat baldintzatu duten epailearen eta VARaren erabakiak izan ditu hizpide Athleticeko atezainak. Zuri-gorriek 3-2 galdu dute Jagoba Arrasateren taldearen aurka.
Athleticek porrota jaso du Son Moixen epailearen erabakiek baldintzatutako partidan (3-2)
Zuri-gorriek markagailua bi aldiz parekatu eta nortasuna erakutsi arren, epaileak adierazitako bi penaltiek eta Guruzetari eta Lekueri txartel gorria atera izanak emaitza baldintzatu dute.
Bi partidako zigorra Paredesi, Kopako final-zortzirenetan marrazain bati "kakati" deitzeagatik
Txartel gorria atera zioten (55. min) Cultural Leonesaren aurka jokatutako partidan (3-4).
Valverde: "Gure egoera ikusita, Mallorcaren aurkako partida oso garrantzitsua da"
Athleticek Mallorcaren aurka jokatuko du larunbatean, Son Moixen. Ernesto Valverderen taldeak garaipena behar du, Europara begira jarraitu nahi badu. Jagoba Arrasateren taldeak, berriz, puntuak premiaz pilatzeko beharra dauka, jaitsiera posuetatik urruntzeko.
Nanclaresek alta jaso du, Real Madrilen aurkako partidan hartutako kolpe baten ondorioz ospitaleratuta egon ostean
Olatz Santanak ordezkatu zuen Burgoseko atezaina; hala, Athleticeko jokalari gisa debuta egin zuen.
Urko Izeta: "Partidari buelta emateko gai dela erakutsi du taldeak"
Urko Izeta Athleticeko jokalaria Cultural Leonesaren aurkako kanporaketaz hitz egin du, neurketa amaitutakoan.
Athletic partida zoro batetik bizirik atera da Leonen, eta aurrera egin du Kopan (3-4)
Lehen zatian sei gol izan dira, eta partida hirutan berdintzeko gai izan da Valverderen taldea. Atsedenaldiaren ostean, Paredesi txartel gorria atera diote eta talde zuri-gorria jokalari bat gutxiago zuela geratu da. Unai Gomezek luzapenean penaltiz sartutako golak erabaki du neurketa.