Athleticek gabarra laguntzeko ontzien izen-ematea ireki du

Athleticek eta Bilboko Portu Agintaritzak zaleek gabarrarekin batera ateratzea nahi duten ontziak inskribatzeko protokoloa ezarri dute. Astelehenean aterako da gabarra, Bartzelonaren aurkako Errege Kopako finala irabazten badu Athleticek. Protokoloa "bete beharrezkoa" izango da.

Interesa dutenek mezu elektroniko bidez eman beharko dute izena eta, "eskariak prest dauden tokiak baino gehiago izanez gero", zozketa egingo du Athleticek.

Ibilbidean, honako ontziak debekatuta egongo lirateke: "arraunak dituzten itsasontziak, ur-motorrak, beladun itsasontziak, piraguak, sei metro baino gutxiagoko pneumatikoak, segurtasun antolakuntzan daudenak kontuan hartu gabe".