Albiste da:

Geoghegan Hartek eta Rodriguezek Italiako Giroa utzi dute, erorikoen ondorioz

Tao Geoghegan Hart britainiarra sailkapen nagusiko hirugarrena zen Geraint Thomas liderrarekiko 5 segundora, baina erori egin da helmugarako 66 kilometro falta zirenean, eta lasterketa utzi du. Geroago, Oscar Rodriguez nafarra joan da lurrera, eta ezin izan du jarraitu.

Primoz Roglic eta Tao Geoghegan Hart, helmugaratzen Giroko 8. etapan. Argazkia: EFE

A. B. E. | EITB

2023/05/17 - 19:36

Azken eguneratzea

2023/05/17 - 20:21

Tao Geoghegan Hart (Ineos Grenadiers) eta Oscar Rodriguez (Movistar) txirrindulariek 2023ko Italiako Giroa utzi dute asteazken honetan, maiatzaren 17an, 11. etapan izan dituzten erorikoen ondorioz.

Helmugarako 66 kilometro falta zirenean erori da Geoghegan Hart, eta lasterketa utzi du 2020ko Giroko irabazleak. Erorikoa Alessandro Covik (UAE Emirates) eragin du, eta Geraint Thomas (Ineos Grenadiers) eta Primoz Roglic (Jumbo Visma) ere lurrera joan dira; hala ere, biek ala biek etapa amaitu ahal izan dute.

Kilometro batzuk geroago, Oscar Rodriguez (Movistar) erori da. Nafarroako txirrindularia bide-seinale baten kontra jo da, eta, ondoren, errepide bazterreko etxe bateko hormaren aurka ere. Ospitalera eraman behar izan dute, eta Giroa utzi du.