Geoghegan Hartek irabazi du Sestriere gainean eta Hindley lider jarri da

Bata zein bestea denbora berean daude sailkapen nagusian. Pello Bilbaok laugarren jarraitzen du, baina Almeida 23 segundora gerturatu zaio.

Geoghegan Harten eta Hindleyren arteko esprinta. Argazkia: EFE

AGENTZIAK | ERREDAKZIOA

2020/10/24 - 17:07

Azken eguneratzea

2020/10/24 - 17:07

Tao Geoghegan Hart britainiarrak (Ineos) esprintean irabazi du Alba eta Sestriere artean (190 kilometro) jokatu den Italiako Giroko 20. etapa, Jai Hindley australiarraren (Sunweb) aurretik. Horrenbestez, bi txirrindulari horien arteko lehia izango da Milanen azken garaipena lortzeko, biak denbora berarekin baitaude berdinduta sailkapen nagusian.

Geoghegan Hartek eutsi egin die Sestriereko igoeran Hindleyk egindako erasoei, eta azkenerako bera nagusitu da Giroko azken aldapak ekarri dituen egunean.

Garaipenarek emandako gainsariekin Geoghegan Hartek zerora murriztu du Hindleyk gaur arte zeukan hiru segundoko tartea; alabaina, ehuneko gutxi batzuengatik bada ere, Sunwebeko australiarra izango da sailkapen nagusiko liderraren maglia arrosa eramango duena Milango erlojupekoan (15,6 kilometro).

Bere aldetik, gaur arteko liderra zen Wilco Kelderman sailkapen nagusiko hirugarren postura jaitsi da, 1:32ra. Pello Bilbao (Bahrain-McLaren) gernikarrak, berriz, laugarren postuari eutsi dio, nahiz eta orain 2:51ra egon. Gainera, Joao Almeida (Deceuninck Quick Step) portugaldarra 23 segundora hurbildu zaio.

Etxeondoren lehiaketa

Parte hartu egunero Ez da Giro! saioak martxan jartzen duen lehiaketan, eta asmatu zein den hiru pisten atzean ezkutatuta dagoen txirrindularia. Erantzun zuzen guztiak Etxeondo etxeko maillot eta kulot baten zozketan sartuko dira.