Le Court-Pienaarrek garaipena lapurtu dio iheslari talde bati Tournon-sur-Rhonen, eta Reusserrek horiz jantzita jarraitzen du

Kim Le Court-Pienaar (AG Insurance) txirrindulariak irabazi du Frantziako Tourreko seigarren etapa, Montbrison eta Tournon-sur-Rhone artean jokatu dena (153 kilometro). Mauriziokoak beste zazpi txirrindulari gainditu ditu esprintean. Marlen Reusserrek lider jarraitzen du, Demi Volleringen erasoei eutsi ostean.

Hiru txirrindulari izan dira lasterketa-buru etaparen zati batean, Loes Adegeest nederlandarra (Lidl-Trek), Katreen Aalerud norvegiarra (Uno-X) eta Nikola Noskova txekiarra (Cofidis). Hala ere, tropela lanean jarri da, eta ihes egindako hiru txirrindulari horiek ez dute inoiz abantaila handirik izan. Horrela, Noskova helmugarako 67 kilometroren faltan harrapatu dute.

Jardunaldiko bosgarren igoeran, Col de Laulovesc (2.maila), Adeggest eta Aaleruden abentura ere amaitu da, helmugatik 54 kilometrora.

Ondoren, zenbait eraso saiakeren ostean, beste talde bat osatu da lasterketa-buruan, sei txirrindularirekin: Sarah Van Dam kanadarra (Visma), Celia Gery frantziarra (FDJ), Cedrine Kerbaol bretoia (EF), Elisa Longo Broghini italiarra (UAE), Liane Lippert alemaniarra (Movistar) eta Puck Pieterse herbeheretarra (Fenix), mendiko liderra.

Eguneko azken mendatearen oinean, Cote de Bocieu-le-Roi (3. maila), tropel txikiarekiko minutu erdi eskaseko aldearekin, sei iheslariek ia lau kilometroko igoera laburra gainditu dute lasterketa-buruan. Jaitsieran, 14 kilometrora, Riejanne Markus herbeheretarra (Lidl-Trek) eta Kim Le Court-Pienaar (AG Insurance), Maurizio Uharteetako txapelduna, atzeko taldetik atera dira, aurreko seiak harrapatzeko asmoz.

Tropelean, berriz , Volleringek erritmoa bizitu du, baina Reusser askatzea lortu gabe. Aurreko taldean, Le Court-Pienaar lehenengo, eta handik gutxira, Markus, birritan, erasoa jo dute, helmugan bakarrik aurkeztu nahian, baina ez dute lortu. Azkenean, zortzi txirrindularik esprintean jokatu dute etapa garaipena, eta Le Court-Pienaar nagusitu da.