Olaizolak ez du txapelketan jarraituko lesio bategatik

Aimar Olaizolak ez du Lau t'erdiko ligaxkako azken partida jokatuko, eskuineko eskua lesionatuta daukalako. Hala eman du jakitera Asegarce enpresak ohar baten bidez.

Victorren aurka partida galdu (22-17) ostean finalerdietara sailkatzeko aukerarik gabe geratu zen pilotari nafarrak osasun azterketa pasatu du astelehen honetan. Azterketa horien emaitzak ikusita, Olaizolak erabaki du Joseba Ezkurdiaren aurka jokatu beharreko ligaxkako hirugarren partidan ez aritzea, Ezkurdia matematikoki sailkatuta baitago.

A multzoko beste postua Jokin Altunak eta Victor Estebanek izango dute jokoan, datorren asteburuan euren artean jokatuko duten norgehiagokan, hain zuzen ere.