Albiste da:

Eusebiok 2019ra arte berritu du kontratua Realarekin

Eusebio Sacristan eta Reala bi aldeak lotzen dituen kontratua bi urtez luzatzeko akordiora iritsi dira. 2019. urteko ekainaren 30era arte sinatu du kontratua Valladolideko entrenatzaileak.

ERREDAKZIOA

2017/02/20 - 17:44

Azken eguneratzea

2017/02/20 - 17:44

Realak eta Eusebio Sacristanek bi urtez luzatu dute bi aldeak lotzen dituen kontratua. Ondorioz, Valladolideko entrenatzaileak talde txuri-urdineko teknikaria izaten jarraituko du 2019. urteko ekainaren 30era arte.

Eusebio 2015eko azaroan iritsi zen Realera eta David Moyes ordezkatu zuen karguan. 16. postuan hartu zuen talde txuri-urdina. Bolada txarra eten eta Realak LaLigako 9. postuan amaitu zuen 2015-2016. denboraldia.

Aurten, 2016-2017. denboraldian, Reala joko ona egiten ari da eta bosgarren dago sailkapenean. Txuri-urdinak Txapeldunen Ligako atariko kanporaketa jokatzea bermatzen duen laugarren postua lortzeko borrokan murgilduta daude.