Griezmann: 'Ez dut presiorik sumatzen, disfrutatu egin nahi dut'

Antoine Griezmann Realeko aurrelari frantziarrak bat egin du lehen aldiz Frantziako selekzioarekin asteazkenean Holandaren aurka jokatuko duten lagunartekoa prestatzeko. Griezmannek adierazi duenez, egoerak ez dio "presiorik" eragiten eta "disfrutatzea" da bere helburu bakarra.

"Oso pozik nago hemen egoteaz, eta arro. Iristeko gogoa neukan eta jendeak oso ondo hartu nau, eroso sentitzeko behar dudan guztia eginda", adierazi du 22 urteko jokalariak.

Realeko aurrelaria Didier Deschampsen hamaikakoan izateko aukera handiak ditu, izan ere, Frank Ribery lesio batetik atera berria da eta Frantziako hautatzaileak iragarri duenez, ez du Bayerneko jokalaria arriskuan jartzeko inolako asmorik.