Athleticek puntu bat berreskuratu du Elxen aurka (1-1)

Athleticek 1-1 egin du Elxen aurka larunbat honetan San Mamesen jokatu den EA Sports Ligako 5. jardunaldiko partidan. Buonanottek penaltiz aurreratu du talde andaluziarra, baina Chustek bere atean sartutako gol batek markagailua berdindu du euskal taldeari puntu bat emateko.

Etxekoek baloiaren jabetza monopolizatu dute lehen zatian, eta 6. minutuan eman dute lehen abisua, Sanceten erdiraketa bikain batean; Iñaki gutxigatik ez da iritsi.

Zuri-gorriek pazientziaz jokatu dute, Ruiz de Galarretak eta Sancetek gidatuta, eta Nicok parte hartze handia izan du ezker hegalean, nahiz eta lehen ordu erdian punteria eta erritmoa falta izan zaien.

Navarro, 37. minutuan, gutxigatik ez da iritsi Iñakiren erdiraketa batera; minutu bat geroago, Yurik baloia sare hegalera jaurti du, jokaldi on baten ondoren, eta 40. minutuan Navarrok aurrea hartu du berriro, Iñakiren beste pase bat aprobetxatzeko, baina langara joan zaio.

Atsedenaldiaren ostean, ustekabeko gidoi aldaketa iritsi da. Bigarren zatiko bi minutu eskas igaro direnean, etxekoen defentsako desoreka batek Elxen lehen erasoa ekarri du. Aresok Valerari area barruan falta egin, eta epaileak penaltia adierazi du: Buonanottek gauzatu du (0-1).

Nicok eta Sancetek protagonismoa galdu dute, eta, batez ere, presak ez dio mesederik egin Athletici. 79. minutuan, Berenguerren erdiraketa ahul batean, Iñaki Williamsek baloia ukitu eta 1-1ekoa egin du.

Azken txanpan, zaleek bultzatuta, zuri-gorriek aurkariaren atea estutu dute, baina ez dute golik egin.