Athleticek atsedenaldian itxura oso txarra zuen neurketa irauli eta aukerekin jarraitzen du (2-3)

Athleticek 2-3 irabazi dio Atalantari Bergamon, eta San Mamesen Sporting Portugalen aurka sailkatzeko aukerak agortuko ditu datorren asteazkenean. Valverderen taldeak asko sufritu ostean, lehoiek Scamaccaren gola irauli dute Guruzeta, Serrano eta Navarroren golei esker.

Ernesto Valverderen mutilak aurkariaren areara hurbildu eta Atalanta beldurtzen saiatu dira aurreneko minutuetan. Zuri-gorriek hurbilketa arriskutsua izan dute Bergamoko taldearen atera, baina Athleticek ez du asmatu azken pasean.

Handik gutxira, norgehiagoka kontrolpean zegoela zirudienean, Atalantak aurrea hartu du markagailuan alboko erdiraketa baten bidez. Scamaccak buruz 1-0ekoa jarri du. Simonek ezin izan du ezer egin aurrelari italiarraren burukadaren aurrean, eta Paredesek falta eskatu du, baina alferrik.

Oso gutxirekin Bergamoko taldea aurretik jarri da markagailuan. Ernesto Valverde ez zegoen bere taldearen lanarekin pozik, eta hegaletik lehoiak ordenatzen saiatu da, baina zuri-gorriek ez dute apenas baloirik kontrolpean izan lehen zatian. Gauzak horrela, defentsan aritu dira lehen zatian, erasoan baino gehiago.

Scamaccak bigarren gola egin du 40. minutuan, baina epaileak baliorik gabe utzi du jokoz kanpokoa zela adierazita. Aurretik, Atalantak abagune bikoitza izan du, Unai Simonek gelditu du, baina jokaldia baliogabetu du epaileak. 43. minutuan, alboko beste erdiraketa batean, De Ketelaerek baloia Simonen zutoinera bidali du.

Atsedenaldiaren ostean, Valverdek Sancet sartu du zelaian eta talde zuri-gorriak erreakzio txikia izan du hasierako minutuetan. Zuri-gorrien erantzuna galtzen ari zela zirudienean, Guruzetak Navarrok bularrarekin utzitako baloia ederki baliatu eta jokaldia bikain bukatu du. Italiarren atezainaren aurrean partida berdindu du gipuzkoarrak, eta bere laugarren gola egin du Txapeldunen Ligan.

Jarraian, Viandar de la Verako entrenatzaileak aldaketa gehiago egin ditu: Galarreta eta Vesga Rego eta Jauregizarren ordez, azkena txartel horia zuela joan da aulkira; eta Nico Serrano Unai Gomezen ordez, minutu batzuk geroago. Handik gutxira, protagonista nagusia izan da Serrano, Navarroren erdiraketa bikaina aprobetxatu baitu zuri-gorriak aurretik jartzeko.

Minutu batzuk geroago, beste baloi bat lapurtu du Athleticek eta hirugarren kolpea eman diote Atalantari. Sancetek pase sakon ona eman dio Navarrori, eta horrek baloia gurutzatu du Athleticen hirugarrena egiteko.

Ondoren, Atalantak erasora jo du, eta aldea murriztea lortu du Krstovicek errematatutako hegaleko erdiraketa batean. Horrela, azkenera arte sufritzea suertatu da, baina zuri-gorriek oso garaipen garrantzitsua erdietsi dute, eta bizirik jarraitzen dute txapelketan.

- Fitxa teknikoa:

2 - Atalanta: Carnesecchi; Kossounou, Djimsiti, Kolasinac (Ahanor, 76. min); Zappacosta (Samardzic, 76. min), Roon, Ederson, Bernasconi (Sulemana, 82. min); De Ketelaere, Zalewski (Krstovic, 66. min); eta Scamacca (Lookman, 66. min).

3 - Athletic: Unai Simon: Lekue, Vivian, Paredes, Adama; Jauregizar (Galarreta, 59. min), Rego (Vesga, 59. min); Gorosabel (Areso, 81. min), Unai Gomez (Nico Serrano, 68. min), Robert Navarro; eta Guruzeta.

Golak: 1-0, 16. min: Scamacca. 1-1, 58.m: Guruzeta. 1-2, min.70: Nico Serrano. 1-3. Robert Navarro. 2-3, m.88: Krstovic.

Epailea: Danny Makkelie (Herbehereak). Txartel horia atera die Viviani (22. min) eta Jauregizarri (54. min).

Stadio di Bergamon (New Balance Arena) jokatutako Txapeldunen Ligako faseko zazpigarren jardunaldiko partida, 23.500 ikusle ingururen aurrean, horien artean, Athleticeko 1.500 jarraitzaile.