Athleticek onera egin du, baina ez da nahikoa izan Bartzelona garaitzeko (0-1)

Athleticek 0-1 galdu du Bartzelonaren aurka larunbat honetan San Mamesen jokatu duten EA Sports Ligako 27. jardunaldiko partidan. Zuri-gorriek dena eman dute zelaian, eta beste partida batzuetan falta izan zaien garra ikusi da partidan, baina, hala ere, ezin izan dute Ligako liderra garaitu.

Jokoa hasi eta ia jarraian, Bartzelona bere atean gola sartzeko zorian egon da, Eric Garcia baloia gelditzera joan eta langara bidali duenean. Handik gutxira, Iñakik erdiraketa bikaina jaso du, baina ez du asmatu buruarekin jotzeko orduan, eta aukera paregabea galdu du.

10 minutu geroago, Unai Gomezek kolpe gogorra jaso du belaunean, eta zelaia utzi behar izan du, min hartuta. Robert Navarro irten da haren ordez.

Athleticek ondo irakurri du aurkariaren jokoa, eta sendotasuna erakutsi du defentsan, atzean bilduta aurkari trebeenen jokoa moztu eta kontraerasoan abiadura bilatzeko. Hala, intentsitate berarekin jarraitu du, baina arriskurik sortu gabe.

Minutu horietan, Selton Sanchezek izan ditu aukera argienak: lehenengoan ,jokoz kanpo zegoen, eta bigarrenean, Joan Garcia atezaina adi ibili da gol aukera zapuzteko. Iñakik eta Navarrok ere aukera bana izan dute gola sartzeko, baina jokoz kanpo egon dira biak.

Bigarren zatian, Athleticek erasoaren aldeko apustua egin du, presioa goian mantenduz, eta zailtasunak sortu dizkio Bartzelonari. Etxekoen aukerarik argiena 55. minutuan heldu da, Sanceten jaurtiketa batekin, baina atezainak erraz harrapatu du baloia. Iñakik izan du jaurtiketa hanka artean zenbait aldiz, baina beti izan du atzelari bat alboan oztopatzeko.

Athleticek ondo eutsi dio defentsan, batez ere Vivianen lan onagatik, baina ordua igarota, Lamine Yamalek baloia gurutzatu du eskuin hegaletik eta gol ikusgarria sartu du bigarren zutoinetik; Unai Simonek ez du ezer egiterik izan baloia desbideratzeko (0-1).

Valverdek Vesga, Sancet, Guruzeta eta Eder Garcia zelairatu ditu, markagailuari buelta emateko freskotasuna bilatuz. Dena emanda saiatu dira zuri-gorriak gola bilatzen, baina ezinezkoa izan da. Lamineren gola erabakigarria izan da, eta Athletic punturik gabe geratu da.