2025eko Euskal Herriko Itzuliko 4. etaparen profila, ibilbidea, ordutegia: Beasain-Markina-Xemein (169,6 km)

Apirilaren 10ean, ostegunez, 2025eko Euskal Herriko Itzuliaren laugarren etapa jokatuko dute. Beasainen hasiko da, gerora Bizkaian sartu, berriro ere Gipuzkoara bueltatu, eta Bizkaian bukatuko da, Markina-Xemeinen. 64. Itzuliaren laugarren jardunaldiko ibilbideak 169,6 kilometro izango ditu, eta txirrindulariek mendiko sailkapenerako puntuagarriak diren zazpi mendate igo beharko dituzte; horietako bat, helmugarako hamar kilometro baino pixka bat gehiago geldituko direla igoko dute, 1. mailako Izua da. Maila horretako lehenengoa da, aurtengo ekitaldian, eta antolatzaileek hauxe diote horren gainean: "Hor erabakiko da, zalantzarik gabe, etapako garailea, eta sailkapen nagusiak ere aldeak izango dira". Tropela 13:03an hasiko da lanean, eta irabazleak 17:17tik 17:43ra bitartean altxatuko ditu besoak, helmugako pankartapean.

Hala, Itzuliak, Beasain atzean utzita, Zumarragan, Udanan eta Oñatin izango da, eta, ondoren, etapako lehenengo mendatea igoko dute ziklistek: 3. mailako Asentzio da hori, eta 44,2. kilometroan dago kokatuta. Orduan hasiko dira txirrindulariak Bizkaiko errepideetan barrena; Berrizetik igarota, Muniketa igoko du lasterketak. Hori ere bada 3. mailakoa da; hurrengo 45 kilometroetan, guztira, 3. mailako beste lau mendate gainditu beharko dituzte parte-hartzaileek: Bizkaiko Behatokia, Orontzugarai, Lekoitzegane eta Merelludi. Muniketa ere kontuan izanik, horiek denak 72,3. kilometrotik 117,4. kilometrora bitartean izango dira.

129,6. kilometroan, eguneko aurreneko esprint berezia jokatuko dute; Mutrikun egingo dute, Mijoan. Hogei kilometroren buruan, Elgoibarren, Sigman, bigarrena izango da. Eta, jarraian, Izuarako igoerari ekingo diote; 1. mailako mendate horretan, txirrindulariek 3,5 kilometroko igoera egin beharko dute, eta batez besteko malda % 10,6koa du, baina, adi, Itzuliaren antolatzaileek hauxe nabarmentzen baitute: "Igoera ez da errepide orokorretik edo Krabelinetik Arraterako igoeratik egingo; aldiz, Matsaria industrialdetik joango da, baserri artean doan eta % 20ko maldak dituen errepide oso estu batetik".

Izuak helmugarako hamaika kilometro gelditzen direla du pankarta, eta hori igota, txirrindulariak, azkar-azkar jaitsita, Markina-Xemeinen izango dira, etapa jokatzeko. Bizkaiko herri horretan erabakiko da nor den 64. Euskal Herriko Itzuliko laugarren etapako irabazlea.

Jarraitu etapa, zuzenean, 15:05etik aurrera, eitb.eus-en eta ETB1en.

ETAPAKO PROFILA