Reusser suitzarrak hegan egin du erlojupekoan, eta maillot horia kendu dio Haugseti

Marlen Reusser (Movistar) suitzarrak, Europako eta munduko erlojupeko txapeldunak, ez du hutsik egin bere espezialitatean, astearte honetan, eta Frantziako Tourreko laugarren etapa irabazi du. Era berean, Reusserrek maillot horia jantzi du.

Faborito nagusietako bat zen Cevrey-Chambertin eta Dijon herrien arteko 21 kilometroko erlojupekoan, eta ez du hutsik egin.

Ostadar maillota jantzita, suitzarra izan da azkarrena, tarteko lehen puntua lasterketa-buru izan ondoren, 20 segundoko aldearekin.

Hala eta guztiz ere, Lieke Nooijen herbeheretarrak (Team Visma-Lease a Bike) egindako erlojupekoa ere nabarmentzekoa da. Probaren amaiera oso estua izan da, eta, azkenean, Reusser irabazleak 4 segundoko aldea atera dio Nooijeni Dijongo helmugan.

Horrela, Suitzako txapeldunak garaipena lortu du, eta Nooijen bigarren izan da. Podiumeko hirugarren postua Demi Vollering (FDJ United-SUEZ) nederlandarrak eskuratu du, irabazlearekiko 17 segundoko aldea zuela.

Orain, sailkapen nagusian Reusser da nagusi, bere ibilbidean lehen aldiz jantzi du maillot horia, 11:47:36ko denborarekin, Volleringenekiko 14 segundoko aldea zuela, eta Cedrine Kerbaol frantziarrarekiko (EF Education-Oatly) 54koa.

Asteazken honetan bosgarren etapa jokatuko da, 140 kilometroko ibilbidea, Macon eta Belleville-en-Beaujolais artean, mendi ertaineko ibilbide gogorra, 2.800 metrotik gorako desnibel metatuarekin.