Thymen Arensman bigarrenez gailendu da 2025eko Frantziako Tourrean, La Plagnen

INEOS Grenadiers taldeko Thymen Arensman txirrindulari herbeheretarrak 2025eko Frantziako Tourreko hemeretzigarren etapa irabazi du, La Plagnen, ostiralean; sailkapen nagusiari dagokionez, UAE taldeko Tadej Pogacar ziklista esloveniarrak ez du arazorik izan maillot horiari eusteko. Arensmanek Superbagneresen ere lortu zuen garaipena, hamalaugarren etapan, eta orain, La Plagnen, bakarka egin du igoera, Pogacarren eta Vingegaarden multzoa atzean utzita, eta ahalegin bikaina eginda, aldeari eutsi dio. Jonas Vingegaard (Visma-Lease a Bike) eta Pogacar bigarren eta hirugarren postuetan helmugaratu dira.

Alpeetako bigarren etapa handi honetan, ibilbidea murriztu egin dute; txirrindulariek, agian hori baliatuta, gogo handiz ekin diote lanari. Col du Pre gogorra atzean utzita, Cormet de Roselenderako igoera hasi aurretik, hiru gizon zebiltzan ihes eginda, Roglic, Paret-Peintre eta Lenny Martinez, eta Campenaerts, Foss, Rubio eta Armirail 35 segundora zihoazen; indartsuenen multzoak minutu batera baino gutxiagora zuen lasterketa burua.

Amaierarako 30 kilometro falta zirela, Primoz Roglic soilik zebilen lasterketa buruan, baina Red Bull-BORA taldeko esloveniarrak abantaila txikia zuen tropelarekiko, hogei bat segundo hain zuzen ere. Horrenbestez, La Plagnerako igoerari ekin diotenean, hogei bat txirrindulari zebiltzan multzoan, denak batera, eta sailkapen nagusiko denak zihoazen bertan, Vauquelin izan ezik; normandiarra bi minutu inguru ari zen galtzen. Roglic ere zebilen atzetik, egindako ahaleginaren ondorioz.

Hamalau kilometro gelditzen zirela, Arensmanek aurrera egin du, eta Pogacar eta Vingegaard haren parean jarri dira. Hiru gizonak gelditu dira lasterketa buruan, Gall apur bat atzerago zetorrela. INEOSeko herbeheretarrak eraso gehiago jo ditu, eta, azkenean, segundo batzuetako abantaila lortu du Tourreko bi gizon indartsuenekiko; mugimendu hori giltzarria izan da etapan, azen finean. 

Helmugarako hamar kilometrora, Arensmanek minutu erdiko aldea zuen Pogacar, Vingegaard, Lipowitz Onley, Gall, Johannessen eta Healy zebiltzan multzoarekiko. Liderrak beste behin aurrera egin duenez, soilik Vingegaard, Lipowitz eta Onley gelditu dira berarekin, jazarpenean. Azken kilometroetan, emozio handia izan da; izan ere, ez zegoen bat ere argi Arensmanen ausardiak eta indarrak garaipenaren saria jasoko zuen; hala gertatu da, eta herbeheretarrak Tour honetako bere bigarren etapa eskuratu du. 

Larunbatean, hilaren 26an, 2025eko Frantziako Tourrak hogeigarren etapa izango du jokoan, alegia, lasterketako 112. ekitaldiko azken-aurrekoa. Jardunaldia Nantuan hasi eta Pontarlierren amaituko da, eta 184,2 kilometroko ibilbidea izango du. Ikusi ahalko dugu, zuzenean, 14:15etik aurrera, ordu horretan hasiko baitira eitb.eus eta ETB4 etapa ematen; ETB1eko emanaldia 15:00etan hasiko da.

Etapako sailkapena

1 - Thymen Arensman (INEOS) 2:46:06

2 - Jonas Vingegaard (Visma) + 0:02

3 - Tadej Pogacar (UAE) d. b.

4 - Florian Lipowitz (Red Bull) + 0:06

5 - Oscar Onley (Picnic) + 0:47

6 - Felix Gall (Decathlon) + 1:34

7 - Tobias Halland Johannessen (Uno-X) + 1:41

8 - Ben Healy (EF) + 2:19

9 - Valentin Paret-Peintre (Soudal) + 3:47

10 - Simon Yates (Visma) + 3:54

Sailkapen nagusia

1 - Tadej Pogacar (UAE) 69:41:46

2 - Jonas Vingegaard (Visma) + 4:24

3 - Florian Lipowitz (Red Bull) + 11:09

4- Oscar Onley (Picnic) + 12:12

5 - Felix Gall (Decathlon) + 17:12

6 - Tobias Halland Johannessen (Uno-X) + 20:14

7 - Kevin Vauquelin (Arkea) + 22:35

8 - Primoz Roglic (Red Bull) + 25:30

9 - Ben Healy (EF Education) + 28:02

10 - Ben O'Connor (Jayco) + 34:34