Tourraren aurretik egingo diren ekitaldiak aurkeztu eta ikurrinarekin kalera ateratzera animatu dituzte zaleak

2023ko Frantziako Tourra, bere 120. urteurrenean, Bilbotik abiatuko da uztailaren 1ean, eta euskal errepideak izango ditu protagonista nagusi lehen hiru etapetan. Hala, Tourraren irteera handia (Grand Départ) iritsi bitartean egingo diren ekitaldien kronograma aurkeztu dute gaur goizean Bilboko Azkuna Zentroan, eta, besteak beste, errepideak eta balkoiak ikurrinez betetzera animatu dituzte zaleak, eta horretaz mintzatu dira Marino Lejarreta, Roberto Laiseka eta Eneritz Iturriaga txirrindulari ohiak.

Laisekak kontatu duenez, "une askotan zure mugetatik haratago joaten zara, baina zaleak bide bazterrean ikusi eta sentitzea, animatzen, jendeak osatutako ilaren artetik pasatzen… Sekulakoa da zer sentitzen den". "Euskal zaleak eta ikurrina beti agertzen dira. Pirinioetan hainbeste aldiz astindu ondoren, herrialde oso baten harrotasuna erakutsiz, orain etxean atera behar dugu", gaineratu du Laisekak.

Marino Lejarretaren aburuz, "ia ez da beharrezkoa jendea errepidera irtetera animatzea. Ziur nago zaleek erantzun egingo dutela, beti egin dute, oso fidelak dira. Txirrindulari gisa joan garen edozein lekutara, gutako edozein, euskaldun bat zegoen lekuan ikurrina bat zegoen". Hala, errepidera ikurrinarekin ateratzeaz gain, etxeetako balkoietan ere jartzera animatu ditu zaleak, "munduko txirrindularitza zalerik onenak garela erakusteko".

Bestalde, Eneritz Iturriagaren esanetan, ikurrina "sentimendu kolektibo baten sinboloa da, euskaldun guztiak ordezkatzen eta batzen dituen bakarra".

2023KO EKITALDIAK

Bingen Zupiria Eusko Jaurlaritzako Kultura eta Hizkuntza Politikako sailburu eta bozeramaileak, uztailaren 1, 2 eta 3an munduko tropeleko txirrindulari onenek Euskadin pedalkadak ematen hasi arte egingo diren jardueren berri eman du, txirrindulari ohien adierazpenen aurretik.

"Proposamen ugari eta publiko orori zuzendutakoak izateak herritar guztiek mundu mailako ikuskizun handienetako honetan partaide sentitu eta parte hartzeko borondatea islatzen du", nabarmendu du sailburuak.

Hala, martxoaren 22an, Tissot erloju klasikoa instalatuko da Bilbon, eta hurrengo egunean 100 eguneko atzerako kontaketaren hasierari ekingo zaio. Une horretatik aurrera, ekitaldi zaparrada hasiko da. Besteak beste, Bilbo, Gasteiz eta Donostiako eraikin enblematikoak horiz argiztatuko dira, ikus-entzunezko ikuskizunak izango dira Arabako hiriburuan, eta Donostiak maillot erraldoi baten estreinaldia hartuko du.

"Frantziako Tourraren etorrera Euskadin txirrindularitzarekiko sentitzen den grina handia erakusteko aukera paregabea da", adierazi du Zupiriak. Gogo hori erakusteko moduetako bat gure errepideetan pedalei eragitea izango da. Grand Départ Pays Basquek, Tourreko lehen etaparen erreplika bat antolatzeaz gain, L´Étape Bilbao By Tour De France (ekainaren 11n), euskal egutegiko bi proba zikloturista tradizionalen edizio bereziak garatzen elkarlanean dihardu: Donostia-Baiona-Donostia (maiatzaren 13an) eta Gasteizko Proba Zikloturista (ekainaren 24an).

Gobernuko bozeramailearen arabera, "familiek ere hamaika jarduera izango dituzte. Euskadi Txirrindularitza Fundazioak antolatutako BiziTour Jaiak nabarmenduko dira". Donostian, maiatzaren 7an; Gasteizen, ekainaren 4an, eta Bilbon, ekainaren 25ean, bizikleta jai familiar bana izango da. Martxa herrikoi labur batzuk egingo dira, kilometro gutxikoak, bizikleta kultura eta mugikortasun iraunkorra jai giroan sustatzeko.

Tourraren 110. edizioa hasieraren aurreko astean "mundu mailako oihartzun handiko" ekitaldiak izango dira. "Ekainaren 29an Fan Park gunea inauguratuko da Areatzako pasealekuan, Bilbon"; txirrindularitzari eta bereziki Frantziako Tourrari buruzko "parke tematiko" gisako bat izango dena.

Egun horretan bertan, arratsaldean, 2023ko Frantziako Tourreko Taldeen Aurkezpen Ofizialaren txanda iritsiko da, eta ia 200 herrialdetan izango da ikusgai. "Guggenheim Bilbao Museoaren ingurune zabalean egingo da eta publiko orori zuzenduta dago. Festa honetan, gainera, lasterketako protagonista nagusiak hurbiletik ikusteko aukera izango da", nabarmendu du. Ekainaren 30ean, atsedenaldia, hurrengo hiru egunetan Bilbo – Bilbo (185 km), Gasteiz – Donostia (209 km) eta Zornotza – Baiona (185 km) etapekin sortuko den "eztandari aurre egiteko".