Bilbao Basketek porrota jaso du Unicajaren aurka

RETAbet Bilbao Basketek porrota jaso du Unicajaren aurka (77-70) jokatu duen Endesa Ligako hamargarren jardunaldiko partidan. Bost garaipen eta bost porroteko balantzea du orain Alex Mumbruk zuzentzen duen taldeak.

Neurketari hasiera ona eman dio Bilbao Basketek, 0-5 irabazten hasi baita. Pixakanaka, etxeko taldea desabantaila murrizten hasi da, eta aurrea ere hartu du, hiru puntuko errenta lortuta (13-10). Bizkaiko taldeak azkar berdindu du lehia (13-13) eta berriro aurretik jarri da (14-15). Lehen laurdeneko azken txanpan, ordea, Unicaja nagusi izan da, eta Malagako taldeak bost puntuko abantaila eskuratu du (20-15). Bilbao Basket estutasunetan egon da, baina Kulbokaren hiruko bati esker, bi puntura murriztu du desabantaila lehen hamar minutuen amaieran (20-18).

Bigarren laurdeneko lehen minutuetan Unicaja izan da jaun eta jabe, zuloa ireki duelarik (28-22), baina RETAbet Bilbao Basketek azkar erreakzionatu du, eta ez dio ihes egiten utzi (28-26). Ordutik aurrera estutu egin da norgehiagoka. Unicaja aurretik ibili da laurden guztian zehar, Bilbao Basketek neurketa berdindu duen arte (32-32). Bigarren laurdenaren amaiera oso parekatua izan da, eta etxekoak iritsi dira abantailarekin atsedenaldira (37-35).

Atsedenaldiaren ostean nagusi izan da Unicaja eta talde andaluziarra abantailak handitzen hasi da, hamar puntuko errenta eskuratu duelarik (49-39). Bilbao Basket ezinean ibili da hirugarren laurdenaren hasieran, baina minutuak aurrera joan ahala jokoa hobetu du, aldeak murrizten hasi da, eta sei puntuko desabantailarekin heldu da azken laurdenera (56-50).

Amaierako hamar minutuetan, Unicajak ez dio inongo aukerarik eman Bilbao Basketi. Malagako taldea jaun eta jabe izan da, eta azken laurdenaren erdialdean, hamabost puntuko errenta lortu du (72-57). Ia erabakita utzi du neurketa Unicajak laugarren laurdeneko lehen bost minutuetan, eta Bilbao Basketek emaitza pixka bat txukuntzea lortu duen arren, ezin izan du porrota eragotzi (77-70).

Fitxa teknikoa:

77-Unicaja (20+17+19+21): Thompson (7), Avramovic (0,)Toupane (12), Adams (14) eta Gerun (2) -hasierako taldea- Fernández (9), Diaz (11), Elegar (7), Waczynski (11), Ejim (1), Guerrero (0), eta Suarez (3).

70-Bilbao Basket (18+17+15+20): Rousselle (6), Martínez (10), Balvin (8), Sulejmanovic (9) eta Bouteille (6) -hasierako taldea- Brown (8), Rodriguez (5), Schereiner (3), Rigo (0), Cruz (-), Lammers (7) eta Kulboka (8).

Epaileak: Calatrava, Manuel eta Sanchez Cutillas.