Kosner Baskoniak galdu egin du Badalonan (82-63), eta hirugarren partida jokatu beharko du

Asisa Joventutek hirugarren partida behartu du final-laurdenetako kanporaketan Kosner Baskonia garaituta (82-63), Dani Mireten taldeak hasieratik amaierara arte menderatu duen norgehiagokan.

Badalonakoek azeleragailuarekin ekin diote bigarren partidari, distantzia ertain eta luzetik oso ondo ibili den Cameron Hunten eskutik. Kosner Baskoniak erasorako aukerak hobetu ditu pixkanaka, batez ere Matteo Spagnolo gazteari esker, zenbait jokaldi on egin baititu bere taldea apur bat hurbiltzeko.

Asisa Joventutek, ordea, ez du maila jaitsi, eta 25-14koarekin bukatu du lehen laurdena.

Partidaren gidoia ez da aldatu bigarren laurdenean. Baskoniarrek ez dute erreakzionatu eta etxekoek abantaila are gehiago handitu dute. 22 puntu behera joan ostean, Kosner Baskoniak hobera egin du erasoan zein defentsan, eta Trent Forrest buru, 0-9ko azken partziala egin dute atsedenaldira 44-31ko markagailuarekin joateko.

Bigarren zatian, bi taldeek saskiratze trukea izan dute, baina Asisa Joventutek abantaila handia hartu du berriro Hunten enegarren saskiratzeari esker. Hiruko batekin, 62-43koa jarri du hirugarren laurdenaren amaieran.

Eskolta estatubatuarrak, saskiratze erritmoa jaitsi beharrean, hiruko jaurtiketak gauzatzen jarraitu du eta partida erabakita utzi du Kosner Baskonia garaitzeko (82-63).