Kosner Baskoniak Kopako ajea ordaindu du Buesa Arenan Valentziaren aurka jipoia jasota (79-108)

Kosner Baskoniak jipoia jaso du Valentzia Basketen aurka gaur gauean Gasteizko Buesa Arena pabiloian jokatu den Euroligako norgehiagokan (79-108). Etxeko taldeak Kopako esfortzua eta ondorengo ospakizunak ordaindu ditu talde laranjaren kontra. Garaipen argi honekin, Valentzia sailkapeneko bigarren postuan kokatu da. Bestalde, Baskonia, aukerarik gabe dagoeneko, are gehiago hondoratu da sailkapenean.

Partida hasi aurretik, Baskoniak, Tadas Sedekerskis kapitaina buru zuela, Errege Kopa eskaini die zaleei kantxa erditik. Paolo Galbiati entrenatzaileak gaurko porrotaren ostean iragarri duenez, Sedekerskisi ebakuntza egingo diote berriro, eta "denboraldia bukatu arte ez du gehiago jokatuko".

Baskoniak lehen laurdenetik ordaindu du Kopako ajea. Valentzia Basket askoz hobeto hasi da, etxeko taldeari 0-7ko partziala eginez lehen minutuetan. Gainera, Howardek eta Radzeviciusek bina falta egin dituzte oso azkar. Galbiatik partida gelditu du bere lehen hutsartearekin, markagailuan 6-17ko emaitza kezkagarria zegoenean. Diakitek erasoko errebotean egindako lana eta Simmonsen intentsitatea izan dira etxeko taldean aipagarriena. Hala ere, hori ez da nahikoa izan Valentziari eusteko (16-35).

Bigarren laurdenean, Paolo Galbiatiren jokalariek ez dute partidaren dinamika aldatzea lortu. Baskoniak ez du intentsitate handirik erakutsi defentsan, eta erasoan kamuts aritu da. Aitzitik, Valentziako taldeak berea egiten jarraitu du, Baskoniaren uztaia behin eta berriro zulatuz, etxekoen defentsa ahularen aurrean. Bisitariak 33 puntu aurretik joan dira atsedenaldira (35-68).

Aldageletatik bueltan, norgehiagokaren gidoia ez da aldatu, eta Pedro Martinezen mutilek partidan agintzen jarraitu dute, etxekoen ezintasunaren aurrean. Monterok, Reuversek eta Keyk Baskoniaren uztaia zulatzen jarraitu dute, Costellok eta Moorek lagunduta. Galbiatiren mutilek intentsitatea handitu dute zertxobait, eta borroka gehiago egin dute, baina, hala ere, bisitariak 35 puntuko aldearekin iritsi dira azken laurdenera (58-93).

Azken laurdenak Valentziaren garaipena baieztatzeko baino ez du balio izan. Horrela, partidaren amaiera tramite hutsa bihurtu da. Galbiatiren taldea markagailua makillatzen saiatu da, baina ez du lortu (79-108).

Galbiati "triste" agertu da bere zaleei garaipenik oparitu ezin izan dielako. "Partida gogorra espero nuen, baina ez horrelakoa. Valentzia da prestatu gabe aurre egiteko talderik txarrena", nabarmendu du lonbardiarrak.

"Datozen hiru egunak burua garbitzeko erabili behar dira", esan du, eta Valentziaren dinamika aldatzea "ezinezkoa" izan dela onartu du, bisitariei "meritu handia" emanez. "Estilo argiarekin, energiarekin eta talentuarekin jokatzen du", gaineratu du.

"Entrenatu behar duen taldea gara, eta jokalari guztiak fisikoki eta mentalki prest egon behar dira", azpimarratu du Galbiatik. "Ez gara talde hau", esan du.