Horrelakoa izan da euskal kirolarien jardunaldia abuztuaren 2an, ostirala

SURFA

BELAR-HOCKEYA:

Chefo Basterra eta Rafa Vilallonga euskal kirolariek galdu egin dute Espainiako selekzioarekin Herbehereetakoaren kontra jokatutako partida, 5-3ko emaitzarekin. Beraz, Espainia multzoko laugarren postuan geratu da, baina final-laurdenetarako txartela eskuratu du.

ARRAUNA, LEMAZAINIK GABEKO BIKOA:

Esther Brizek diploma olinpikoa lortu du lemazainik gabeko bikoan, Aina Cidekin batera, B finala irabazita. Orotara, Briz eta Cid zazpigarren sailkatu dira.

SASKIBALOIA (3x3):

Gracia Alonso bizkaitarrak garaipena bereganatu du Espainiako selekzioarekin Australiaren aurka (17-21). Horrenbestez, Espainiak jarraian galdutako bi partidako bolada txarra eten du.

Bestalde, Hortense Limouzin lapurtarrak galdu egin du Frantziako selekzioarekin Alemaniaren kontra jokatutako partida, 21-30eko emaitzarekin.

ESKUBALOIA:

Kauldi Odriozola, Garciandia eta Sergey Hernandez euskal jokalariek porrot egin dute Alemaniaren aurka (33-31) Espainiako selekzioarekin. Horrela, Espainiak Kroazia menderatu beharko du igandean, final-laurdenetara sailkatzeko.

GOLFA:

Jon Rahmek goranzko bidea hartu du. Barrikakoak egin beharrekoa egin du, eta lehen eguneko emaitza hobetu du 5 parretik behera eginda; beraz, parretik behera 9 kolpe daramatza.

Horrela, Matsuyama japoniarrak, Xander Schauffele estatubatuarrak eta Tommy Fleetwood ingelesak (11 parretik behera) partekatzen duten lehen postutik 2 kolpera geratu da.

SASKIBALOIA:

Espainia Olinpiar Jokoetatik at geratu da, Kanadaren aurka 88-85 galduta. Horrenbestez, amaitu da Dario Brizuela eta Xabier Lopez-Arostegui euskal jokalarien ibilbide olinpikoa.

FUTBOLA:

Espainiako selekzioak 0-3 irabazi dio Japoniari, Parisko Olinpiar Jokoetako final-laurdenetako partidan, Fermin Lopezek (2) eta Abel Ruizek sartutako golei esker, eta, ondorioz, dominak bereganatzeko lehian izango dira Aimar Oroz, Beñat Turrientes eta Jon Pacheco futbolari euskal herritarrak. Maroko izango dute aurkari datorren asteleheneko finalurrekoan.

SASKIBALOIA (3X3):

Saskibaloiko 3x3 modalitateko Espainiako emakumeen selekzioa Kanadari gailendu zaio (22-20), Sandra Ygueravidek luzapenean egindako saskiratze ikusgarri bati esker. Sei partidatatik lau irabazita, Espainiak bideratuta dauka txapelketako bigarren fasea.

Gracia Alonso de Arminio jokalari bilbotarraren taldea zuzenean igaroko da finalaurrekoetara, zortziko multzoan lehenengo edo bigarren tokian geratuz gero. Bigarrenetik seigarrenerako postuetan sailkatzen diren taldeek, berriz, final-laurdenetan lehiatuko dira.

Bestalde, Frantziak 13-14 galdu du Alemaniaren aurka eta, ondorioz, Olinpiar Jokoetatik kanpo geratuko da Hortense Limouzin jokalari lapurtarraren taldea, jokatutako sei partidatatik bakarra irabazi baitu.