Realak aurrerapauso handia eman nahi du Lisboan, Benficaren zelaian, Txapeldunen Ligan jarraitzeko

Realak Txapeldunen Ligako final zortzirenetan izateko gakoa izan litekeen aurrerapauso bat eman nahi du gaur gauean, 21:00etatik aurrera, Da Luz Lisboako futbol zelaian, Benficaren aurka, Europako txapelketa nagusiaren multzoen faseko hirugarren jardunaldian. Imanolen gizonek lau puntu dituzte, multzoen faseko aurreneko lehen bi jardunaldiak jokatuta, eta Portugalgo taldeak, aldiz, ez du punturik eskuratu oraindik; estu-estu dabil, ondorioz. Aurreikuspena da Realaren hasierako hamaikakoan, larunbatean Reale Arenan Mallorcaren aurka EA Sports Ligako neurketan jokatutako partidarekin alderatuta, neurketa horretan titular izan ez ziren hainbat jokalari sartzea: Traore, Le Normand, Barrenetxea eta Kubo, kasu.

Gipuzkoako taldean, Kieran Tierneyk, Andre Silvak eta Alvaro Odriozolak jokatu ezinik jarraitzen dute, baina, Jon Magunazelaia eta Gaizka Ayesa gazteak kenduta, Imanolek gainerako jokalari guztiak ditu prest. Historian lehen aldiz arituko da Reala Benficarekin nor baino nor gehiago. Benfica kontinenteko klub handienetakoa da; bi aldiz irabazi du Europako Kopa (1960an eta 1961ean), eta beste bost alditan jokatu du finala Europako txapelketarik handienean. Hori bai, talde txuri-urdinak jakin badaki zer den Lisboan jokatzea, Sporting Portugal aurkari hain zuzen; bi aldiz lehiatu da Reala azken talde horren aurka, bata Europako Kopan, 1982-83 denboraldian, eta bestea UEFA Kopan, 1988-89 denboraldian, eta bietan egin zuen aurrera Realak. Lisboan, 1-0 galdu zuen Donostiako taldeak aurrenekoan, eta 1-2 irabazi, ordea, bigarrenean.

Roger Schmidt alemaniarra da Benficaren egungo entrenatzailea. 2022-23 denboraldian, Lisboako taldea Txapeldunen Ligako final laurdenetaraino iritsi zen; Inter Milanek kanporatu zuen, eta Italiako taldea, hain zuzen ere, Realaren eta Benficaren multzo berean dabil orain, D multzoan. Salzburgoren aurka 0-2 galdu zuen, etxean, lehen jardunaldian, eta 1-0 Milanen; hortaz, ez du punturik oraindik, eta asko du jokoan gauean, horrenbestez.

Realaren aurkariak ez du golik sartu, oraingoz; hori, golak egitea, denboraldi honetan izaten ari den arazo handienetakoa da. Gonçalo Ramos aurrelaria Paris Saint-Germain taldean dabil, joan den udatik, eta Benficak ez du ordezko egokienik topatu, orain arte. Arthur Cabral brasildarra fitxatu zuen, Fiorentina taldetik, baina ez dabil espero bezain fin; hala, Schmidten konponbidea izan da Petar Musa kroaziarra zelairatzea aurrealdean. Casper Tengstedt danimarkar gaztea ere ibili da erdiko aurrelari gisa, bai eta Rafa Silva hegalekoa ere.

Angel Di Maria argentinarra dabil ondoen golak egiteari dagokionez; hain zuzen ere, sei gol sartu ditu denboraldian, orain arte. Di Maria San Siron lesionatu zen, Inter Milanen kontra, eta, beraz, ez zuen jokatu aurreko astean Portugalgo Kopan; Orkun Kokçu turkiarrak eta Alexander Bah danimarkarrak ere atsedena izan zuten, txuri-urdinen aurkako neurketarako erabat prest izatea helburu.

Atzealdean, sasoi betean dabilen Take Kubo Realeko jokalariari aurre egite aldera, eskarmentu handia duen Nicolas Otamendi argentinarra eta Antonio Silva gaztea ditu Benficak erdiko atzelari gisa; Antonio Silvak 19 urte ditu soilik, baina titular dabil Portugalgo selekzioan. Gainera, zelai erdian, harrobitik ateratako futbolari bikain bat du Realaren aurkariak, Joao Neves.

Gaur gauerako balizko hamaikakoak

Benfica: Trubin; Bah, Otamendi, Antonio Silva, Aursnes; Neves, Kokçu; Di Maria, David Neres, Rafa; Musa.

Reala: Remiro; Traore, Zubeldia, Le Normand, Aihen; Zubimendi, Merino, Brais; Kubo, Oyarzabal, Barrenetxea.

Epailea: Clement Turpin (Frantzia).

Partida Lisboako Da Luz futbol zelaian jokatuko dute, 21:00etan hasita.