Realak ezin izan du berdindu Atleticoren jokoa (3-2)

Realak 3-2 galdu du Atletico Madrilen aurka larunbat honetan Riyadh Air Metropolitano zelaian jokatu den EA Sports Ligako 27. jardunaldiko partidan. Bi aldiz berdindu dute markagailua, Solerren eta Oyarzabalen golekin, baina Ivan Gonzalezek azken minutuetan sartutako golak punturik gabe utzi ditu txuri-urdinak.

Kopako finala izango denaren probako partidan, Atletico indartsu hasi da, eta azkar ireki du markagailua. 5. minutuan, Sorloth txuri-urdin ohiak erdiraketa on bat jaso, eta boleaz sarera bidali du baloia (1-0).

Hala ere, Realak jarraian erantzun du, eta 4 minutura lortu du berdinketa. Sucicek pase bikaina eman dio Solerri, eta horrek, ezkerkada indartsu batekin, atearen txokotik sartu du baloia (1-1).

Ondorengo minutuetan, etxeko taldeak berriz hartu du agintea, eta hurbilketa arriskutsuak izan ditu, Sorloth eta Giuliano jokalarien eskutik gehienbat. Erasoko jokaldietako batean, Madrilgo taldeak penaltia eskatu du Giuliano area barruan lurrera joan denean, baina epaileak ez du ezer adierazi.

Lehen zatiko azken aukera euskal taldeak izan du, Sucicen urruneko jaurtiketa batekin.

Bigarren zatia ere Atleticoren agintearekin hasi da, eta Matarazzok lehen aldaketak egin ditu, Oyarzabal, Guedes eta Zakharian zelairatuz. Etxeko taldeak ere aldaketak egin ditu, eta horrek emaitzak eman dizkio.

Griezmann area barruraino sartu da, atzerantz pase bikaina eman dio Nico Gonzalez zelairatu berriari, eta honek aurretik jarri du bere taldea (2-1).

Baina, berriz ere, gutxi iraun die pozak etxekoei, hurrengo minutuan Oyarzabal kapitainak berriz jarri baitu berdinketa markagailuan, ezkerkada batekin (2-2).

Remiroren geldiketak ezinbestekoak izan dira bere taldea sendo mantentzeko, baina, lehen jaurtiketa gelditu badu ere, ezin izan du Nico Gonzalezen burukada gelditu (3-2). Gol horri esker lortu ditu Atleticok 3 puntuak, baina Realak Kopako finalean izango du errebantxa hartzeko aukera.