Athletic finalean izango da, Granadan galdu arren (2-1)

Athletic Errege Kopako finalerako sailkatu da ostegun honetan, nahiz eta 2-1 galdu duen Granadaren aurka, Nuevo Los Carmenes estadioan. Alabaina, joaneko neurketan lortutako 1-0ekoak txapelketan aurrera egitea eta apirilaren 18an izango den behin betiko neurketa jokatzea ahalbidetu die zuri-gorriei.

Andaluziako taldeak bere aldeko izan du kanporaketa une batean, Carlos Fernandezek eta German Sanchezek bigarren zatian sartutako golei esker; aitzitik, Yuri Berchichek 81. minutuan egindakoak etxekoen ametsak zapuztu ditu.

Gaizka Garitanok aurreikuspenak bete ditu, eta Mikel San Joseren aldeko hautua egin du hasierako hamaikakoan ateratzeko, zigortuta zegoen Dani Garciaren lekua bete zezan, Granadaren geldikako jokaldiak hobeto defendatzeko asmoz.

Horrez gain, Derioko entrenatzaileak hiru erdiko atzelariz osatutako defentsa lerroa zelairatu du, bertan izan dira Yeray, Unai Nuñez eta Iñigo Martinez.

Neurketari zuhurtziaz ekin diote talde biek, arrisku handirik hartu gabe; hori bai, etxekoak sarriago lotu dituzte erasoko jokaldiak. Dena den, jokoak apenas izan du erritmorik, talde bateko zein besteko faltak elkarren atzetik pilatu baitira hastapenean.

Aitzitik, hogeigarren minututik aurrera, lehiak bizitasun handia hartu du. Neurketako lehendabiziko abagune garbia bilbotarren aldekoa izan da, 23. minutuan. Williamsek ihes egin du eskuin hegaletik abiaduraz. Area barrura erdiratu du, eta, baloia alderatzeko asmotan zebilen Victor Diaz atzelariak bere atearen aurka errematatu du. Rui Silva atezainak gelditu bikaina egin behar izan du gola eragozteko.

Bost minutu geroago, San Joserena izan da saiakera. Korner baten ostean, Yurik barneraldia egin du ezkerretik, atzera erdiratu du, eta area txiki barruan zegoen erdilari nafarraren jaurtiketa ez da atera joan gutxigatik. Ia jarraian, Williamsek baloia lapurtu die atzelari andaluziarrei, eta hark ere atzeraka erdiratu du Raul Garciaren bila, baina haren errematea ere eskasa izan da.

Ondoren, lehen zatiak ordu erdia bete duenean, etxekoen txanda izan da. Bi hurbilketa arriskutsu kateatu dituzte Unai Simonen inguruetan. Horietako bigarrenean, Simon nahasi egin da baloi bat urruntzeko garaian, eta estutasuna eragin du zelaira bertaratu diren zale zuri-gorrien artean.

Granadak lehen zatiko azken unean izan du bere aukerarik nabarmenena. Yangel Herrerak buruz errematatu du korner bat, eta Iñaki Williamsek urrundu behar izan du atepetik baloia, ateko marra zeharkatzeko zorian zegoela.

Haatik, andaluziarrek berehala orekatu dute kanporaketako markagailua atsedenalditik bueltan. Izan ere, Carlos Fernandezen burukada bikain baten bidez 1-0ekoa lortu dute, Machisek ezkerretik jarri duen erdiraketa baliatuta. Aurrelari andaluziarrak Unai Simon inoiz heldu ezin zen tokian jarri du baloia.

Partida nola zegoen ikusita, Garitanok lehendabiziko aldaketa egin du bigarren zatiko hamabosgarren minutuan, Iñigo Cordoba zelairatu eta Capa kenduz. Horrek defentsaren eraldatzea ekarri du, Yeray pasatu baita eskuin hegalera.

Hala ere, taldearen egituran egindako eraldaketa horrek ez dio espero zuen emaitzarik ekarri talde zuri-gorriari, eta sufritzen jarraitu du hurrengo minutuetan ere, Granadak ekinean jarraitu baitu du. Hartara, etxekoei saria etorri zaie 76. minutuan. Korner bat atera dute, eta Germanek garbi gainditu du Unai Nuñez jauzian, baloia sare barrura bidaltzeko.

Kanporaketak itxura txarra hartu du lehoientzat, Los Carmenes zelaian jaia nagusi baitzen une horretan. Garitanok berehala egin du bigarren aldaketa, Aduriz jokoan jarri baitu San Joseren ordez. Alabaina, neurketa zailen zegoenean, Athleticek partidako jokaldirik onena antolatu du ezker hegaletik. Yuri area barruan barneratu da Vesgak sakonean emandako pase batekin, eta zarauztarraren zartakoaren aurrean Rui Silva atezainak ez du erantzunik izan.

Azken txanpan, Granada ahalegindu da finalera eramango zuen golaren bila, baina Machisek gaizki egindako erremate bat besterik ez du lortu arrisku moduan.

Horrenbestez, apirilaren 18an Sevillako Cartuja estadioan jokatuko den Kopako finalak bi euskal talderen arteko derbia hartuko du, bertan izango baitira Athletic eta Reala nor baino nor gehiago.

Fitxa teknikoa:

Granada: Rui Silva, Foulquier (Fede Vico, 84. min), Victor Diaz, German, Domingos Duarte, Carlos Neva (Antoñin, 84. min), Gonalons, Yangel Herrera (Yan Eteki, 60. min); Antonio Puertas, Machís eta Carlos Fernández.

Athletic Club: Unai Simon, Capa (Cordoba, 59. min), Yeray, Nuñez, Iñigo Martinez, Yuri, San Jose (Aduriz, 79. min), Vesga, Raul Garcia, Muniain (Sancet, 92. min) eta Williams.

Goles: 1-0, 48. min: Carlos Fernandez. 2-0, 76. min: German. 2-1, min. 81: Yuri.

Epailea: Del Cerro Grande. Txartel horiak: German (Granada); Yeray eta Vesga (Athletic).