FIFAk 10 partidako zigorra jarri dio Paredes argentinarrari Munduko Txapelketako finalaren osteko istiluengatik
Futboleko erakunde goreneko Diziplina Batzordeak isunak eta zigorrak iragarri ditu liskarrean parte hartu zutenentzat. Paredes ez ezik, Nahuel Molina, Thiago Almada, Gavi, Roberto Ayala eta Argentinako Futbol Elkartea (AFA) ere zigortu dituzte.
Espainiako eta Argentinako ordezkarien arteko liskarra 2026ko Munduko Txapelketako finalaren ostean. Argazkia. Europa Press.
FIFAren Diziplina Batzordeak ostiral honetan jakinarazi ditu Espainiak eta Argentinak Estatu Batuetako, Mexikoko eta Kanadako 2026ko Munduko Txapelketako finalaren ostean izandako istiluengatik jarritako zigor gogorrak.
Neurketaren ostean, Nahuel Molinak ukabilkada bat eman zion Rodriri, eta Eric Garciak kargu hartu zion. Leandro Paredesek lepotik heldu zion orduan, eta Gavi tartean sartu zenean, argentinarrak lurrera bota zuen Bartzelonako jokalaria. Liskarrean, Roberto Ayala Argentinako teknikariak ukabilkada bat eman zion lepoan Dani Olmori.
Horrela, Leandro Paredes Boca Juniorseko erdilariari 10 partida eta 90.000 dolarreko zigorra (77.000 euro baino gehiago) ezarri diote. Nahuel Molina Erroma taldeko eskuin hegaleko atzelariari (duela gutxira arte Atletico Madrileko jokalaria izan da) 7 partidako zigorra eta 90.000 dolarreko isuna ezarri diote.
Bestalde, Thiago Almada River Plateko jokalariak (aurreko denboraldian Atleticon aritu zen) partida bat jokatu gabe eman eta 30.000 dolarreko isuna ordaindu beharko du (26.000 euro), Pablo Paez Gavira 'Gavi' Bartzelonako erdilariak bezala.
Gainera, Roberto Ayala Valentziako edo Zaragozako futbolari ohi eta Lionel Scaloniren talde teknikoko kideak 3 partidako zigorra jaso du eta 30.000 dolar ordaindu beharko ditu.
AFAk FIFAren zigorrak errekurrituko ditu
FIFAk AFA (Argentinako Futbol Elkartea) ere zigortu du, Argentinak FIFAren Diziplina Kodeko zenbait artikulu hautsi zituelako Munduko Txapelketan zehar, eta 321.000 dolarreko (275.000 euro) isuna jarri dio. Horrez gain, Argentinak lokal gisa jokatuko dituen hurrengo bi partidak ikusle kopuru mugatuarekin jokatu beharko ditu, estadioaren edukieraren % 50 bakarrik beteta.
Horren aurrean, AFAk iragarri du FIFAren isun eta zigor guztien kontrako errekurtsoa jarriko duela.
Zure interesekoa izan daiteke
Aitor Larrazabal: “Ez dakit ekonomikoki Espanyol guretzako onena zen, baina talde indartsua da"
Levante UD-Eibar, Cacereño-Alaves eta Osasuna-Logroño United, Erregina Kopako hirugarren kanporaketan
Anaitasunak “ilusio handiz” egingo dio aurre Alavesi Errege Kopako lehen kanporaketan
Anaitasuna-Alaves, Prat edo San Rafael Athleticen aurka eta Atletico Calatayud-Osasuna, Errege Kopako lehen kanporaketan
Errege Kopako lehen kanporaketa eta Erregina Kopako hirugarren kanporaketa astelehenean zozkatuko dituzte
Anaitasuna Errege Kopako lehen kanporaketarako sailkatu da, eta Lehen Mailako talde baten aurka arituko da
Athleticek Reala garaitu du Euskal Herria Txapelako finalean (0-1)
Maroan Sannadiren golak eman dio Athletici Euskal Herria Txapela
FUTBOLA ZUZENEAN | Euskal Herria Txapela: Reala vs Athletic
