PSGk abantaila txikia hartu du bi erraldoiren arteko historiarako lehian (5-4)

Paris Saint-Germainek abantaila txikia lortu du Txapeldunen Ligako finalerdietako joaneko partidan, Bayern Munichen aurka. Bi erraldoiren arteko historiarako lehian, azken markagailua 5-4koa izan da, eta dena irekita utzi du itzulerako norgehiagokari begira.

Luis Enriqueren taldeak hiru goleko errenta izan du partidan zehar. Kvaratskheliak eta Dembelek bina gol egin dituzte, eta Joao Nevesek beste bat, baina Bavariako taldeak erantzun bikaina eman du, Harry Kane, Michael Olise, Upamecano eta Luis Diazen golen bidez.

Parisen, giro paregabean, lehen 45 minutuak kalitate izugarrikoak izan dira, abagunez beteak. Lehen minutuetan talde alemaniarrak bereganatu du baloia. Lehen ordu laurdena baino lehen, Matvei Safonovek baloia goleko marratik atera du, eta Joshua Kimmichek jaurtiketa desbideratu du.

Minutu biren buruan, Luis Diaz area barruan sartu da, eta hanka une egokian luzatu du, baloiaren bila joan den Willian Pachok lurrera bota zezan. Epaileak penaltia adierazi du eta Harry Kanek, jaurtiketan, engainatu egin du Errusiako atezaina (17. min).

Luis Enriqueren jokalariak jota zeudela, Michael Olisek bigarren gola egiteko aukera ona izan du, baina Safonovekin topo egin du. Hala ere, PSG laster suspertu da, eta berdinketa lortzear egon da, baina Ousmane Dembelek Manuel Neuerren aurrean ez du asmatu.

Khvicha Kvaratskheliak, ordea, ez du hutsik egin, bakarkako jokaldi bikain batean, Josip Stanisic atzean utzi eta eskuadran jarri du baloia (24. min).

Frantziako taldearen minuturik onenak izan dira. Bederatzi minutu geroago, Olisek beste aukera bat izan du, eta partidari buelta ematea lortu du, Dembelek kornerretik erdiraketa egin eta gero. Joao Nevesek sare barrura bidali du baloia (33. min).

Urrezko Baloia eta Desire Doue behin eta berriz saiatu dira. Hala ere, Musialak Bayernen bigarren gola barkatu du partidaren lehen ordu erdia bete denean.

Talde jokaldi batean, berdinketa jarri dute berriro markagailuan, Olisek egindako jaurtiketari esker. Etxeko atezainak ezin izan du ezer egin (41. min).

Partida atsedenaldira bidean zen, VARak, Carlos del Cerro Grande espainiarraren agindupean, Sandro Scharer epaile suitzarrari area barruan Alphonso Daviesen eskua egon zitekeela jakinarazi dio eta. Penaltia zela egiaztatu ondoren, Dembelek 3-2koa ezarri du (45+5 min).

Eta lehen zatia eromena izan bada, bigarrenak are ezusteko gehiago zituen gordeta. Inspirazio handiko hiru minuturi esker Bayernek gainditu ezinekoa zirudien errenta eskuratu dute Luis Enriqueren jokalariek; PSGren kontraeraso bikain batean, Kvaratskheliak Achraf Hakimiren pasea jaso du, eta fusilatu egin du Neuer (56. min). Ia jarraian, 59.ean, Dembelek 5-2koa egin du jaurtiketa bikain batekin.

Vincent Kompanyren taldeak ez du etsi, eta Dayot Upamecanoren bidez markagailuan berriz hurbildu da, Kimmichen erdiraketa zehatza aprobetxatuta (65. min). Hiru minutu geroago, Luis Diazek Kaneren pase luze bat jaso du, eta, Marquinhos eserita utzi ondoren, gola egin du. Epaileak VARari galdetu dio, eta jokaldia baliozkotu du.

Safonovek Jonathan Tahren berdinketa eragotzi du, eta Senny Mayuluk Bayernen zutoinera bidali du baloia. Azken minutuan, Pachok Bavariako taldeak berdintzea eragotzi du berriro. Futbolari omenaldi ederra egin diote gaurko partidan.