Sportingek kanporaketa irauli eta Bodoren ametsa zapuztu du, eta PSGk, Real Madrilek eta Arsenalek aurrera egin dute

Sportingek, luzapenean, oso zaila zen kanporaketa irauli du astearte honetan, eta Txapeldunen Ligako final-laurdenetarako txartela lortu du, Bodo/Glimt 5-0 mendean hartuta. Horrenbestez, Norvegiako taldearen ametsa eta balentria ezerezean geratu da.

Etxekoak helburu argi batekin atera dira zelaira: joaneko neurketan 3-0 galdu ondoren markagailua iraultzea, eta Norvegian jokatu zuten bestelako futbola egin dute, indartsuagoa eta dinamikoagoa, atseden hartuta, asteburu honetan Portugalgo Ligan partidarik jokatu ez dutelako.

Bestalde, lehiaketako egungo txapeldunak, Paris Saint-Germainek, joaneko 5-2koaren ostean, 0-3ko emaitzarekin aise irabazi dio Chelseari, Khvicha Kvaratskhelia eta Bradley Barcolaren (biak lehen 15 minutuetan) eta Senny Mayuluren golei esker (bigarren zatian).

Real Madrilek, Bernardo Silvari txartel gorria atera (20 minutu) ondoren, Manchester Cityren markagailua iraultzeko saiakera zapuztu du, Vinicius Juniorren bi golei esker (1-2), eta kanporaketan 1-5 nagusitu da.

Joaneko 3-0eko abantailarekin hasi den itzulerako partida garraztu zaie zuriei, 20. minutuan, epaileak Bernardori txartel gorria atera baitio, ateko marra gainean baloia besoarekin ukitu duelako. Epaileak penaltia adierazi du, eta Vinicius Juniorrek, hamaika metroetatik, ez du huts egin.

Erling Haalandek berdinketa lortu du atsedenaldira iritsi aurretik, eta Courtois aldatu behar izan dute atsedenaldian, min hartuta zegoelako. Hala ere, City ez da ezein momentutan egon Alvaro Arbeloaren taldea sailkatzea eragozteko zorian.

Premier Leagueko liderrak Ligako Kopako finalean, FA Cupen eta orain Europako zortzi talde onenen artean jarraitzen du. Mikel Arteta donostiarraren Arsenalek ere egin beharrekoak egin ditu Bayer Leverkusenen aurka. Kanporaketa etxean erabakita utzi du, eta, hirugarren urtez jarraian, Txapeldunen Ligako final-laurdenetan izango da (2-0).

Nahiz eta joanekoan banakoa azken minutuetan eta penaltiz lortu, eta Leverkusenek urteko partidarik txarrenetakoa egin arren, Arsenal sailkatu da gaur, denboraldi honetako Europako bost partidak irabazi dituen etxean, Londresen.