Ingalaterra finalerdietan sartu da, Norvegiari aise irabazita

Ingalaterra 0 eta 3 nagusitu zaio Norvegiari eta historian bigarrenez sartu da Munduko Txapelketako finalerdietan. Horrez gain, uztailaren 7an Parc Olympique Lyonnais zelaian jokatuko den finala irabazteko faborito nagusienen artean dagoela argi eta garbi utzi dute ingelesek.

Phil Neville zuzendatutako taldea bikain dabil Munduko Txapelketan. Orain arte, ez dute hutsik egin eta jokatutako partida guztiak irabazi dituzte. Lehenengoan 2 eta 1 irabazi zioten Eskoziari; hurrengoan, 1 eta 0 Argentinari; multzoen fasea amaitzeko, Japonia 0 eta 2 gainditu zuten, eta final-zortzirenetan Kamerun kanporatu zuten, 3 eta 0.

Final-laurdenetan, berriz, ingelesak Norvegiaren borrero izan dira. Martin Sjogrenen jokalariek Australiaren aurka egindako ahaleginaren ondorioak pairatu dituzte, partida hura luzea eta gorra izan baitzen eta penaltietan erabaki zen. Norbegiako entrenatzaileak, gainera, ez die titularrei atsedenik eman, eta final-laurdenetako partida jokatu zuen hamaikako bera zelairatu du.

Lehen gola Scottek egin du, Bronzek emandako pasea aprobetxatuta. Ondoren, Parris Premier Leagueko golegile onena eta Cityko jokalariari baloia langaren gainetik joan zaio, area barruan jokaldi ederra egi ostean. Whitek beste aukera argi bat izan du, baina bere jaurtiketak zutoinean jo du, eta ondoren Whitek berak bigarrena egin du, Parrisen asistentzia aprobetxatuta.  

0 eta 2koarekin, eta partida kontrolpean edukita, lanak eginda iritsi da Ingalaterra atsedenaldira. Bigarren zatian neurketa erabakita utzi du Bronzek egindako gol ikusgarriarekin. Ikusleen artean egon den David Beckham aho bete hortz utzi du Ingalaterrako jokalariaren golak.

Fitxa teknikoa

0.- Norvegia: Hjelmseth; Wold (Hansen, 85. min), Mjelde, Thorisdottir, Minde; Saevik (Utland, 64. min), Risa, Engen, Reiten (Eikeland, 74. min); Graham eta Herlovsen.

3.- Ingalaterra; Bardsley; Bronze, Houghton, Bright, Stokes; Walsh, Kirby (Stanway, 74. min), Scott; Parris (Daly, 88. min), White eta Duggan (Mead, 54. min).

Golak: 0-1, 3. min: Scott; 0-2, 40. min: White; 0-3, 57. min: Bronze.