"Ez dut sentitzen jokalarien nahia denik ni ez egotea", esan du Montse Tome Espainiako hautatzaileak

Montse Tome Espainiako futbol selekzioaren entrenatzailearen iritziz, selekzio horretako jokalarien nahia ez da bera eta bere laguntzaileak ez egotea estreinatu berri duten karguan. "Ez dut hori sentitzen", nabarmendu du Tomek. Suediako Göteborg hirian emandako prentsaurrekoan (Espainiak bertan jokatuko du ostiralean, Suediaren aurka, Nazioen Ligako neurketa), Irene Paredes euskal jokalariak esan du Kirol Kontseilu Nagusia "sendo" sartu dela Espainiako selekzioan sortutako krisiaren aurrean; nolanahi ere, Paredesek azpimarratu du nazioarteko futbolariak "bakarrik" sentitu direla. Halaber, Alexia Putellasen hitzetan, jokalariok "ez dugu inor jartzen edo kentzen".

Hala, Montse Tomeren iritzian, Espainiako futbolean dagoen krisia "arlo profesionaletik eta kirol arlotik harago doa", eta esan du bere asmoa beti izan dela futbolariak "babestea" eta haiei "laguntzea, gaizki pasatu baitute".

"Bizi duguna eta bizitzen ari garena larria da, hori egia da, arlo profesionaletik eta kirol arlotik harago doa. Denok dakigu zer gertatu zen finalaren egunean. Garaipen sinestezin bat ospatzen egon beharko genuke, eta gertatu zena oso desatsegina izan zen. Nire iritziz, kirol arlotik kanpo dago", adierazi du Tomek. Luis Rubialesen musukatu ostean, Jenni Hermoso "sufritzen" ikusi zuela esan du; ondorengo egunetan, baina, Tomeren iritziz, "dena nahasi zen, pixkanaka". "Nire asmoa beti izan da laguntzea; entrenatzailea naiz, baina jokalari sentitzen naiz, eta, bereziki, pertsona", gehitu du.

"Argitaratu da jokalariek ez dutela nahi gu hemen egotea; nik ez dut hori sentitzen, ez diet entzun. Zaindu egin behar dugu hori, informazioa baieztatu behar dugu, egia zabaldu. Denok egin dezakegu okerren bat, baina denok izan behar gara profesionalak", zehaztu du.

Entrenatzailearen ustez, bere lehenengo lerroa eta ondorengo polemika "interpretazio akatsa" izan da; hori esan du galdetu diotenean ea jokalariekin hitz egin zuen zerrenda jendaurrean eman baino lehen: "Nik esan nuen futbolariekin hitz egin nuela, ez denekin; inork ez zidan galdetu ea guztiekin hitz eginda nuen deialdian sartuko zirela. Esan nuen, eta errepikatu egiten dut, ez nuela esango norekin nuen hori hitz eginda, ezta zer hitz egin genuen ere", nabarmendu du.

Irene Paredes Espainiako selekzioko jokalari gipuzkoarrak, bere aldetik, azaldu du "behartuta" joan direla deialdira aste honetan, Nazioen Ligako partidetarako, baina onartu egin zutela geratzea Kirol Kontseilu Nagusiari entzuteko. Erakunde hori, Paredesen esanetan, "sendo" sartu da, futbolariek Espainiako Futbol Federazioan eskatutako aldaketen bila. Aldaketa horiek eskatu dituzte emakumeak "baztertuta" daudelako Federazioan.

"Aurreko egunean, ez genuen etorri nahi. Erabakita genuen, hainbat elkarrizketaren ostean, ezin genuela etorri, ez zela unea, baina behartu gintuzten etortzera. Behartuta etorri ginen, eta bilera batzuk izatea onartu genuen. Hortik aurrera, erabaki genuen gelditzea. Adostutako akordioen artean, zigortuak ez izatea izan zen, eta geratzeko erabakia hartu genuen; ez gustura geundelako, baizik eta hori baita egin behar genuena akordioek eta honek aurrera egin dezaten".

Alexia Putellasen arabera, Espainiako selekzioko jokalariok "ez dugu inor jartzen edo kentzen", eta "ez dugu inoiz eskatu Espainiako Futbol Federazioko inor kargugabetzea". "Kezka eta iritzi batzuk adierazi ditugu, taldea ez baitzegoen eroso haiengatik. Informazioa dagokionari helarazi diogu, baina entrenatzailea eta kirol zuzendaria pertsona bera zen, Jorge Vilda. Gu beti joaten gara garbi, futbolean gardentasuna izatea nahi dugu, eta gu ere halakoak izan behar gara", adierazi du.