Osasuna, Athletic, Girona eta Rayo Vallecano, Europan jokatzeko txartel baten bila
Osasuna, Athletic, Girona eta Rayo Vallecano Europan jokatzeko txartel bat lortzen saiatuko dira Santander Ligako azken jardunaldian. Gorritxoek bakarrik dute hori euren esku, eta Rayo Vallecanok du aukera gutxien, hainbat baldintza bete behar baitira Madrilgo taldeak helburua lortzeko.
Azken-aurreko jardunaldian Getaferen aurka galdu arren, Osasuna da Konferentzia Ligarako postua lortzeko ondoen kokatuta dagoena. Girona hartuko du Sadarren, eta, irabaziz gero, zazpigarren postua lortuko du, beste taldeen emaitzen zain egon beharrik gabe. Horrenbestez, partida irabazi ezean hasiko dira gorritxoak kalkuluak egiten. Osasunak berdintzen badu, Athleticek eta Rayo Vallecanok galtzea izango litzateke gorritxoen aukera bakarra Europan sartzeko. Gironaren aurka galduz gero, berriz, ez du inolako aukerarik izango.
Hain zuzen ere, 2022-2023 denboraldian ezustekoa eman duen taldeetako bat denez, Gironak lehia zuzen hori irabazi behar du, eta Athleticen emaitzaren zain egon. Kataluniako taldeak bigarren itzuli ikusgarria egin du, eta Europarako sailkapena lortzeko aukerak dituela heldu da azken jardunaldira. Konferentzia Liga jokatzeko txartela lortzeko, Gironak Osasuna menderatu behar du eta Athleticek ez du Bernabeun irabazi behar. Berdinketak edota porrotak aukerarik gabe utziko du.
Azken hiru jardunaldiak jokatu aurretik, Athletic zen aukera gehien zituen taldea, baina Sadarren Osasunaren aurka eta San Mamesen Elxen aurka galdu ostean, Ernesto Valverdek zuzendutako taldeak ez dauka bere esku Europarako sailkapena lortzea. Athletici Real Madrilen aurka irabazteak bakarrik balio dio, eta, hala eta guztiz ere, Osasuna-Girona neurketako emaitzaren zain egon beharko luke; izan ere, hiru puntuak eskuratzeaz gain, zuri-gorriek Gironak Osasunaren aurka berdintzea edo irabaztea beharko luke.
Rayo Vallecanori dagokionez, Europarako sailkapenak amaiera emango lioke Andoni Iraola entrenatzaileak egindako etapari. Europan jokatzeko txartela zaleen ametsa izan da denboraldi osoan zehar. Ametsa gauzatzeko, ordea, Rayok mendean hartu behar du Mallorca, Athleticek ez dio Real Madrili irabazi behar eta Gironak berdindu egin behar du Osasunaren aurka.
Bestalde, Sevilla ere Europarako lehian sartuta zegoen, baina Europa Ligako txapelduna denez, Andaluziako taldeak Txapeldunen Liga jokatuko du datorren denboraldian. Sevilla zazpigarren edo hortik gora geratuz gero, ez litzateke egongo Santander Ligako ordezkaririk Konferentzia Ligan. Horretarako, Sevillak irabazi egin beharko lioke Realari, eta Osasunak, Athleticek, Gironak eta Rayok galdu egin beharko lukete.
Zure interesekoa izan daiteke
Matetaren gol batek Iñigo Perezen Rayoren ametsa zapuztu du, eta Crystal Palace txapeldun egin du
Aurrelari frantziarrak Augusto Batallak arean aldaratutako baloi bat aprobetxatu du final parekatua erabakitzeko, eta bere historian inoiz baino urrunago iritsi den Rayoren ametsa zapuzteko.
Realak Bartzelona estutu du, baina galdu egin du Alexia Putellasen agurrean (2-1)
Pinak talde kataluniarra aurreratu du lehen zatiko 14. minutuan, Emmak banakoa egin du 32.ean, baina Aitanak 2-1eko gola sartu du atsedenaldia baino lehen. Alexia Putellas Bartzelonako izarraren azken partida izan da Johan Cruyff futbol-zelaian.
Elxeko entrenatzailea izateari utzi dio Eder Sarabiak
“Gelditzeko, deskonprimitzeko eta beste gauza batzuei kasu egiteko momentua da”, adierazi du entrenatzaile bilbotarrak, prentsaurrekoan. 2024-2025 denboraldian lortu zuen Elxek lehen mailarako igoera, eta 2025-2026 denboraldian maila mantentzea lortu du, Eder Sarabiaren laguntzarekin.
Arene Altonaga kapitainak Eibar utziko du zortzi urteko ibilbide luzearen eta bi igoeren ostean
Altonaga 2018an iritsi zen talde armaginera, 25 urterekin, eta historia egin du Eibar Lehen Mailara eramanez. Hurrengo denboraldian talde gipuzkoarra berriro jaitsi bazen ere, urtebete geroago berriz ere igo zen.
Naroa Uriartek 25 urterekin utziko du futbola, bi belauneetan lesio larriak izan ondoren
Bakioko jokalaria 2018an Munduko eta Europako 17 urtez azpiko txapeldun izan zen. Zazpi denboraldi eman ditu futbolaren maila gorenean. Talde zuri-gorriarekin 38 neurketa ofizial jokatu ditu eta, gainera, bi denboraldi eman ditu utzita Granadan. Igandean omenaldia egindo diote Lezaman.
Juan Cruz: “Ohorea eta harro egoteko modukoa izan da Osasunaren armarria defendatzea”
Atzelari madrildarrak Nafarroako kluba utzi du, azken sei denboraldiak Iruñean eman ostean. Agur esatean, nabarmendu du 2023ko Errege Kopako finala dela haren oroitzapenik bereziena, eta, halaber, taldekideekin eta Taxoaren egunero-egunero bizi izandakoa.
Oliver Glasner, Crystal Palace taldeko entrenatzailea: “Ez dakit zer ematen dieten jaten euskal entrenatzaileei”
Austriarrak Londreseko Crystal Palace taldea zuzentzen du, eta, asteazkenean, Iñigo Perezen Rayo Vallecano izango du aurkari Konferentzia Ligako finalean; Glasnerrek Iñigo Perez bera, Unai Emery edo Mikel Arteta, besteak beste, izan ditu hizpide.
Athleticek DUX Logroñori irabazi dio Las Gaunasen eta liga lehen zortzien artean amaitzea ziurtatu du (0-2)
Javi Lergak zuzentzen duen taldeak aurrea hartu du 15. minutuan, Ane Azkonak sartutako golari eskerz. Bigarren zatian, Maddi Torrek bigarren gola egin du 52. minutuan. Zuri-gorriek datorren denboraldian Erreginaren Kopako kanporaketa bat gutxiago jokatu beharko dute.
Eibarrek puntu bat lortu du Sevillaren aurkako partidan
Eibarrek hutsean berdindu du Sevillan, etxetik kanpo puntu bat eskuratuz. Azken jardunaldiaren faltan, armaginek hamahirugarren postuan jarraitzen dute. (Bideoa gazteleraz)
Braulio Vazquez: “Uste dut pizgarri bat behar genuela, katarsi bat"
"Ez dut barkamenik eskatuko 8 urtez lehen mailan mantentzeagatik, nortzuk garen jakin behar dugu. Ez dakit zenbat aldiz entzun dudan anbizio falta dagoela", aurpegiratu du kirol zuzendari gorritxoak denboraldi amaierako prentsaurrekoan. Bestalde, Kike Barja kapitainaren kontratu berritzea % 99ra itxitzat jo du.