Santander Ligako Osasuna-Athletic derbia maiatzaren 25ean jokatuko dute Sadarren, 19:30ean

Santander Ligako 36. jardunaldiko Osasuna-Athletic derbia maiatzaren 25ean, ostegunarekin, jokatuko dute Sadarren, 19:30ean, Ligak iragarri duenez. 35. jardunaldian, maiatzaren 20an, larunbata, 21:00etan, Reala Camp Nou zelaian arituko da, Bartzelonaren aurka, eta neurketa hori erabakigarria izan liteke talde txuri-urdinak Txapeldunen Ligarako txartela ziurtatzeko. Gainera, Ligak eta Espainiako Futbol Federazioak iragarri dute azken bi jardunaldietan, alegia, 37.ean eta 38.ean, ordutegi bateratua izango dela.

Beraz, guztiz zehaztu dute zein ibilbide izango duten Santander Ligako hiru euskal taldeek Errege Kopako finalaren osteko hiru jardunaldietan. Osasunak, maiatzaren 6an finala jokatu ondoren, Girona jasoko du Sadarren, maiatzaren 13an, larunbata, 16:15ean, 34. jardunaldian; gerora, Jagoba Arrasateren taldea Madrilera joango da, 35.ean Atletico Madril izango baitu aurkari, Metropolitanon, maiatzaren 21ean, igandea, 16:15ean. Hurrengo ostegunean, hilaren 25ean, 19:30ean, Osasunak Athleticen kontra jokatuko du, etxean.

Reala 2023-24 denboraldiko Txapeldunen Ligan izateko lehian dabil, bikain, eta 34. jardunaldian, Gironaren aurka arituko da Anoetan, maiatzaren 13an, 16:15ean; 35.ean, Bartzelonaren kontra jokatuko du, bisitari gisa, hilaren 20an, 21:00etan; maiatzaren 23an, asteartea, 36. jardunaldian, Girona hartuko du, 19:30ean, etxean.

Vila-real, Celta eta Osasuna izango dira Athleticen aurkariak Ligako 34., 35. eta 36. jardunaldietan. Ernesto Valverderen taldeak maiatzaren 13an bisitatuko du Zeramikaren estadioa, 18:30ean, eta Celta jasoko du, San Mamesen, maiatzaren 20an, larunbata, 16:15ean. Bost egunen buruan, hilaren 25an, Sadarreko derbia jokatuko dute.

Horrez gain, Ligak eta Espainiako Futbol Federazioak iragarri dute Santander Ligako eta SmartBank Ligako azken bi jardunaldiak, 37.a eta 38.a eta 41.a eta 42.a, hurrenez hurren, ordutegi bateratuan jokatuko dutela. Jokoan zerbait duten norgehiagoka guztiei eragingo die, hauek izango baitira jokoan: Liga, UEFAren txapelketetarako txartela, Espainiako Superkopa, Lehen Mailan jarraitzea, Bigarren Mailako titulua, Lehen Mailara zuzenean igotzea, igotzeko play-offak jokatzea eta Bigarren Mailan jarraitzea.

Espainiako Federazioak adierazi duenez, zenbait partidatan aipatutako kirol helburuetako bat jokoan izanez gero, neurketa horiek bateratuta programatuko dituzte, beste kirol helburu batzuk dituzten taldeen ordutegiekin bat egin gabe. Helbururik jokoan ez duten partidak, aldiz, bateratutako ordutegitik kanpo programatuko dituzte.