Juan Ayusok irabazi du La Molinan eta Kataluniako Itzuliko lider berria da; Mikel Landa, hirugarren

Juan Ayuso UAE taldeko txirrindulari kataluniarrak irabazi du 2025eko Kataluniako Itzuliko hirugarren etapa, La Molina eski estazioan, asteazkenean, eta, halaber, sailkapen nagusiko lehen postuan kokatu da. Ayusok oso gutxigatik gainditu du, helmugan, Red Bull-BORA taldeko Primoz Roglic; izan ere, bi ziklista horiek izan dute jokoan etapa garaipena. Sailkapen nagusian, Ayusok sei segundoko aldea du Roglicekiko, eta Mikel Landa hamaika segundora dabil; murgiarra hirugarren postuan helmugaratu da, eta sailkapen nagusian toki horretan bertan da.

Etapa ikusgarria izan da, oso gogorra, eta euskal txirrindularitza lasterketa buruan ibili da; Caja Rural-Seguros RGA taldea, Alex Molenaarren bidez, eta Kern Pharma, Mats Wenzelek ordezkatuta, eguneko ihesaldian izan dira, eta, azken zatian, Mikel Landa bikain ibili da. Murgiarra ia-ia Ayusoren eta Roglicen parean izan da, gainerako txirrindulari guztiak baino indartsuago.

Juan Ayusok berretsi egin du, beste behin, sasoi puntu oso onean dabilela. 2025eko denboraldian, Tirreno-Adriatico lasterketa du irabazita, dagoeneko, eta orain, Voltan, baieztatu egin du sailkapen nagusia eskuratzeko faborito nagusietako bat dela.

Etapako sailkapena

1 - AYUSO Juan (UAE) 5:49:29

2 - ROGLIC Primoz (Red Bull) d. b.

3 - LANDA Mikel (Soudal) + 0:02

4 - MARTINEZ Lenny (Bahrain) + 0:04

5 - VAN EETVELT Lennert (Lotto) d. b.

6 - MAS Enric (Movistar) d. b.

7 - BERNAL Egan (INEOS) d. b.

8 - LOPEZ Harold Martín (XDS) d. b.

9 - CARAPAZ Richard (EF Education) d. b.

10 - YATES Adam (UAE) d. b.

Sailkapen nagusia

1 - AYUSO Juan (UAE) 14:30:49

2 - ROGLIC Primoz (Red Bull) + 0:06

3 - LANDA Mikel (Soudal) + 0:11

4 - MAS Enric (Movistar) + 0:14

5 - LECERF Junior (Soudal) + 0:17

6 - MARTINEZ Lenny (Bahrain) d. b.

7 - CARAPAZ Richard (EF Education) d. b.

8 - DE PLUS Laurens (INEOS) d. b.

9 - VAN EETVELT Lennert (Lotto) d. b.

10 - BERNAL Egan (INEOS) d. b.

Asteazkeneko beste lasterketetako emaitzak

Asteazkenean ere jokatutako beste lasterketetan, Paul Double Jayco-AlUlako britainiarrak irabazi du Coppi eta Bartali Nazioarteko Asteko bigarren etapa, eta sailkapen nagusiko lider dabil; Brujas-La Panne Klasikoan, Juan Sebastian Molano UAEko kolonbiarrak eskuratu du garaipena; eta Alentejoko Itzulian, lehenengo etapan, EF Education taldeko Noah Hoobs britainiarra nagusitu da.