Pogacarrek irabazi du Rouenen, ikusgarria izan den etapan, eta Van der Poelek maillot horiari eutsi dio

Tadej Pogacar UAE taldeko txirrindulari esloveniarrak 2025eko Frantziako Tourreko laugarren etapa irabazi du, Rouenen, asteartean, amaiera ikusgarria izan duen jardunaldian, eta Alpecin-Deceuninck taldeko Mathieu van der Poel ziklista herbeheretarrak, etapan bigarren tokia bereganatuta, maillot horiari eutsi dio, sailkapen nagusiko lider jarraitzen baitu, Pogacarren denbora berean. Tadej Pogacarrek, horrenbestez, profesionaletan lortzen duen ehungarren garaipena eskuratu du, Visma-Lease a Bikeko Jonas Vingegaard hirugarren helmugaratu da, eta Tourra irabazteko hautagai nagusiek emozioz betetako amaiera eman diote jardunaldiari.

Remco Evenepoel (Soudal Quick-Step) zazpigarren postuan helmugaratu da, Pogacar hiru segundora zuela; Mattias Skjelmose (Lidl-Trek) bederatzigarren sartu da, zazpi segundora; Primoz Roglicek (Red Bull-BORA) denbora gehiago galdu du, 32 segundo. UAEk eta Vismak lehia estu-estua izan dute lasterketako azken kilometroetan, eta liderrak, alegia, Van der Poelek, berriro ere maila oso ona eman du; herbeheretarrak oso gertu izan du bigarren etapa garaipena, eta Pogacarrek soilik aurreratu dio.

Kasper Asgreen (EF Education), Lenny Martinez (Bahrain-Victorious), Thomas Gachignard (TotalEnergies) eta Jonas Abrahamsen (Uno-X) sartu dira eguneko ihesaldian; helmugarako 70 bat kilometro gelditzen zirela, bi minutuko aldea zuten tropelarekiko. Horietan, Lenny Martinez iritsi da urrutien; amaierarako hogei kilometro falta zirela harrapatu dute frantziarra. Azpimarragarria da nola Bahraineko ziklistak sortu zuen ihesaldia, etapa hasi bezain laster.

Côte de la Grand'Mare mendate labur eta gogorrean, etapa bukatzeko hamar bat kilometro gelditzen zirenean, UAE eta Visma izan dira tropelaren buruan, lasterketan erritmo bizi-bizia zegoela. Jonas Vingegaarden taldea gogor ari zen, lasterketa Rampe Saint-Hilairera gerturatzen ari zela; hor, Pogacarrek erasoa jo du, baina Vingegaardek erantzun ona eman du, bai eta, apur bat geroago, Remco Evenepoelek ere.

Rouenen sartuta, Tourra irabazteko lehian dabiltzan gizonen arteko lehiak bere horretan jarraitu du, eta etapa garaipena zen jokoan zegoen saria. Indartsuenen esprintean, Van der Poelek jo du aurrena, baina herbeheretarrak Pogacarrekin egin du topo; esloveniarrak profesional gisa eskuratzen duen ehungarren garaipena erdietsi du.

2025eko Frantziako Tourreko bosgarren etapa asteazkenean jokatuko dute, eta egun garrantzitsua da, lasterketako 112. ekitaldiko lehenengo erlojupekoa izango baita. Caenen egingo dute, eta 33 kilometroko ibilbidea izango du, eta pentsatzeko modukoa da espezialistek izango dutela garaipena eskuratzeko aukera, laua baita. EITBk zuzenean emango du; eitb.eus-ek 14:25ean egingo du bat etaparekin, eta ETB1ek ordea, 15:00etan.

Etapako sailkapena

1 - Tadej Pogacar (UAE) 3:50:29

2 - Mathieu van der Poel (Alpecin) d. b.

3 - Jonas Vingegaard (Visma) d. b.

4 - Oscar Onley (Picnic) d. b.

5 - Romain Gregoire (Groupama) d. b.

6 - Joao Almeida (UAE) d. b.

7 - Remco Evenepoel (Soudal) + 0:03

8 - Matteo Jorgenson (Visma) d. b.

9 - Mattias Skjelmose (Lidl) + 0:07

10 - Kevin Vauquelin (Arkea) + 0:10

Sailkapen nagusia

1 - Mathieu van der Poel (Alpecin) 16:46:00

2 - Tadej Pogacar (UAE) d. b.

3 - Jonas Vingegaard (Visma) + 0:08

4 - Matteo Jorgenson (Visma) + 0:19

5 - Kevin Vauquelin (Arkea) + 0:26

6 – Enric Mas (Movistar) + 0:48

7 - Oscar Onley (Picnic) + 0:55

8 - Joao Almeida (UAE) d. b.

9 - Remco Evenepoel (Soudal) + 0:58

10 - Mattias Skjelmose (Lidl) + 1:02