Baskoniak partida bikaina eginda esan dio agur Euroligari, Real Madrilen aurka (98-102)

Baskonia 2023-24 denboraldiko Euroligatik kanpo gelditu da, asteazkenean, txapelketako play-offeko hirugarren partidan Real Madrilen aurka galduta; porrot horrek, Baskoniak kanporaketako aurreneko bi partidetan izandakoak ere batuta, Real Madrili eman dio Berlinen jokatuko duten Lauko Finalerako sailkatzea, eta Euroligatik at utzi du Gasteizko taldea. Buesa Arenan jokatutako hirugarren partida horretan, Baskoniak 98-102 galdu du; hori bai, Dusko Ivanovicen gizonek oso ondo jokatu dute, eta bikain ibili dira ikusgarria izan den neurketan.

13.000 zalek baino gehiagok bete dute Buesa Arena, partida erabakigarria baitzen, eta giro ezin hobea sortu dute bi taldeek, kantxan, saskibaloiko gau ederra eskaini ahal izan zezaten. Baskoniak kontrolpean izan du markagailua aurreneko hiru laurdenetan, hamar puntuko aldeekin ere (37-27 eta 52-42, bigarren laurdenean, eta 70-60, hirugarrenean); hala ere, Gasteizko taldeak ezin izan du Real Madril atzerago ere utzi, eta azken laurdenean zuriek baliabide guztiak erabili dituzte, ehuneko ehunean. Chus Mateoren jokalariek azken laurdenean erakutsi dute zergatik diren Euroligako egungo txapeldunak, eta meritu handiko garaipena eskuratu dute. Lauko Finalean, horrenbestez, ahaleginduko dira 2023an irabazitako titulua berresten.

Lehenengo bi laurdenetan, Baskoniak eta Real Madril biziki asmatu dute erasoan, eta Dusko Ivanovicen taldea irten da garaile: izan ere, atsedenaldian, emaitza 56-52koa zen. Hirugarren laurdenean, hori gutxi balitz bezala, hainbat jokalditan, Baskoniak lortu du defentsan gehiago estutzea. Real Madrilek emandako erantzuna azpimarragarria izan da; azken hamar minutuak hasi direnean, Arabako taldea 73-72 ari zen gailentzen, baina Real Madrilek bere onena eman du orduan, azken zatian.

Partida ederra egin dute, besteak beste, Markus Howardek (29 puntu), Nikos Rogavopoulosek (18), Vanja Marinkovicek (17), eta Codi Miller-McIntyrek. Azken horrek 17 puntu sartu ditu, hamaika asistentzia eman eta zazpi errebote harrapatu.

Fitxa teknikoa

98 - Baskonia (22+34+17+25): Miller-McIntyre (17), Marinkovic (17), Rogkavopoulos (18), Sedekerskis (2) eta Costello (11) -hasierako bostekoa-, Chiozza (2), Raieste (-), Howard (29), Kotsar (2) eta Diez (-).

102 - Real Madril (22+30+20+30): Campazzo (13), Hezonja (16), Musa (3), Yabusele (23) eta Tavares (12) - hasierako bostekoa -, Deck (13), Llull (8), Poirier (8), Rodriguez (6) eta Fernandez (-).

Epaileak: Robert Lottermoser (Alemania), Uros Nikolic (Serbia) eta Piotr Pastusiak (Polonia). Ez da kanporaturik izan.

Gertakariak: 13.186 zale, Gasteizko Fernando Buesa Arenan.