Laduche eta Manci Eusko Label Winter Serieseko finalerdietako ligaxkan dira, Goitia eta Del Rio garaituta

Ludovic Laduchek eta Mikel Mancik Alex Goitia eta Julen del Rio menderatu dituzte, bi jokotan, 15-8 eta 15-5, 2024-25eko Eusko Label Winter Seriesen, A multzoan, Gernika-Lumoko Jai Alai pilotalekuan, astelehenean. Ondorioz, Laduche eta Manci txapelketako finalerdietako ligaxkarako sailkatu dira, eta Goitiak eta Del Riok, ordea, ligaxka horretan aritzeko aukerarik gabe gelditu dira, nahiz eta oraindik partida bat jokatzeke duten, datorren astelehenean, hain zuzen ere, Barandika eta Lopez bikotearen aurka.

Testuinguru horretan, 2024-25eko Eusko Label Winter Seriesen zehaztuta dago, dagoeneko, zein lau bikotek jokatuko duten urtarrilaren 6an hasiko den finalerdietako ligaxka: A multzoan, Urreisti-Gorka eta Laduche-Manci sailkatu dira, eta, B multzoan, aldiz, Erkiaga-Ibarluzea eta Urrutia-Basque. Horien guztien helburua finalerdietako ligaxkan, otsailaren 16an izango den txapelketako final handian izatea izango da.

Astelehen honetako norgehiagokari dagokionez, Laduche eta Manci, lehen jokoan, nabarmen nagusi izan dira, eta emaitzak, 15-8koak, ondo baino hobeto erakutsi du zer ikusi den Jai Alaiko kantxan. Getariako aurrelaria eta Mutrikuko atzelaria 4-1 aurreratu dira, eta jokoaren amaierara arte izan dute markagailua kontrolpean. Goitia eta Del Riok 4-7koa jarri dute, baina, minutu gutxiren buruan, Laduche eta Manci 13-4raino iritsi dira; markinarra eta gasteiztarra apur bat suspertu egin dira, eta zortzigarren tantoa ere erdietsi dute, baina ezin izan dute gehiagorik egin. Goitiak eta Del Riok akats gehiegi egin dituzte, lehenengo joko horretan.

Egia esan, bigarren jokoan ere ildo beretik jarraitu du norgehiagokak. Laduche eta Manci aise nagusitu dira. Goitiak eta Del Riok lehenengo tantoa egin dute, baina, jarraian, Laduchek eta Mancik zazpi jarraian lortu dituzte. Getariarrak eta mutrikuarrak ez diete inolako aukerarik eman aurkariei; Goitiak eta Del Riok ezin izan dute partidan sartu, ia-ia. Azken finean, jokoaren amaieran izandako 15-5ekoak garaipena eman dio Laduche-Manci bikoteari, eta, halaber, finalerdietako ligaxkarako sailkatzea ere, noski.