Eibarrek 1-1 amaitu du azken minutuak 10 jokalarirekin egin dituen Granadaren aurka

Eibarrek 1-1 amaitu du Granadaren aurka larunbat honetan Ipuruan jokatu den Hypermotion Ligako 21. jardunaldiko partidan. Armaginek aurrea hartu dute markagailuan lehen zatian, Puertasen golari esker, eta markagailuan berdinketa jarri duen gola bigarrenean iritsi da, Pablo Insuaren eskutik.

Neurketa hasi eta 15 minutura, Puertasek area barrutik jaurti du, eta Luca atezaina gainditu du, Gipuzkoako taldea aurretik jartzeko. Epaileak jokaldia berrikusi du jokoz kanpoko posizioa izan den ala ez aztertzeko, baina azkenean gola ontzat eman du.

Etxekoak aurretik iritsi dira atsedenadira, andaluziarrek arriskua sortu duten arren. Bigarren zatian, 52. minutuan, Granadak aukera izan du, baina jaurtiketa langa gainetik joan zaio Ricard jokalariari.

64.ean, bisitariak 10 jokalarirekin geratu dira, epaileak Hongla txartel gorria erakutsiz egotzi baitu. Handik gutxira, Joseba Etxeberriaren taldeak bigarren gola egin du, baina epaileak ez du ontzat eman eta ez da markagailura igo. Nahiz eta jokalari bat gutxiagorekin jokatu, Granadak aurpegia eman du amaiera arte, eta ahaleginak saria eman dio 82. minutuan, Pablo Insuak gola egin baitu. 

Fitxa teknikoa:

1 - Eibar: Magunagoitia, Corpas, Arambarri (Merquelanz, 78. min), Chema, Cristian (Arrillaga 74. min), Nolaskoain (Kento, 74. min), Matheus (Sergio Alvarez, 40. min), Mada, Toni Villa, Puertas (Alkain, 74. min) eta Pascual.

1 - Granada: Luca, Ricard, Insua, Willians, Brau (Oppong, 76. min), Ruben (Tsitaishwili, 64. min), Hongla, Sergio Ruiz, Pablo (Weismann, 64. min), Reinier (Trigueros, 76. min) eta Uzuni (Juanma, 89. min).

Golak: 1-0, 15. min: Puertas. 1-1, 82. min: Insua.

Epailea: Ruben Avalos (Kataluniako Batzordekoa). Txartel gorria atera dio Hongla Granadako jokalariari (64. min), eta horia Insuari, eta Antonio Puertas Eibar taldeko jokalariari ere atera dio txartel horia.